تعلیم نا پڑ آ پرائیویٹ تعلیمی ادارہ غاتا بھلو کڑدار اسے‘ گورنر بلوچستان

کوئٹہ (خ ن) گورنر بلوچستان امان اللہ خان یاسین زئی پارینے کہ راج اٹ تعلیم نا شونداری و خوانندہ غاتا کچ ءِ ودفنگ کن پرائیویٹ تعلیمی ادارہ غاتا بھلو کڑدار اسے‘ او پارے کہ جہانی ناجوڑی کورونا غان ودی مروک حالیت آن پرائیویٹ تعلیمی ادارہ و اوفتتون گنڈوک بندغ آتیا ہم منفی زہم تمانے۔ دا خیال آتادرشانی ءِ او سَے شنبے نادے گورنر ہاوس کوئٹہ ٹی بلوچستان ایجوکیشن فاﺅنڈیشن نا منیجنگ ڈائریکٹر جسٹس (ر) نادرخان ناکماشی ٹی اوڑدہی کروک پرائیویٹ اسکولز ایکشن کمیٹی نا باسک آتون ہیت وگپ کرسا کرے۔پرائیویٹ اسکولز ایکشن کمیٹی نا ڈل اٹ پرنسپل جمیل احمد مشوانی، ایڈووکیٹ موسیٰ لانگو، میر بہادر خان لانگو، سلیم کرد، نعمت اللہ و نواز پندرانی اوار ئسر۔ دا وخت آ گورنر بلوچستان پارے کہ کسفوک آ ناجوڑی کوروناوائرس آن ودی مروک حالیت آن تعلیمی ادارہ غاک ہم زہمی مسنو‘ چناتا تعلیمی نسخان تون اوار اوار نجی تعلیمی ادارہ غاتا غریب استاد ومالک آک ہم خوار ءُ۔گورنر امان اللہ یاسین زئی پارینے کہ دا کل انا نئے بیرہ ننے احساس ارے بلکہ ساڑی حکومت مچ آصوبہ ٹی زوت غٹ تعلیمی چرجوئی ءِ پبی وڑ اٹ بدحال کننگ کن پرعزم ءِ۔ ڈل گورنر بلوچستان ءِ کورونا غان مروک نسخان تیان معلومدار کرسا پارے کہ دا وخت آ پرائیویٹ تعلیمی ادارہ غاتے بھاز آ مشکل و ویل آک مون تروک ءُ۔ ڈل خواست کرے کہ پرائیویٹ تعلیمی ادارہ غاتون مالی کمک کننگے تاکہ مروک نسخانک پورو مننگ کیر۔ گورنر بلوچستان اوفتے مون تروک مشکل و ویل آتے چکار اٹ خف تورے و اوفتے ایسر کننگ کن ہر وڑ انا کمک نا باور کرفے۔