کورونا و ایلو ویل آتا توننگ کن بنجا و صوبہ غاتے اوارکاریم کروئی تمک‘ اسد قیصر

 اسلام آباد(آن لائن) اسپیکر قومی اسمبلی اسد قیصر پارینے کہ ملک اٹ جمہوریت نا جوانی کن بلدیاتی ادارہ غاتا سوگوی المی ءِ، اُلس ءِ بنداوی آسراتی و زوت اس و ہڑزان انصاف تننگ اٹ بلدیاتی ادارہ غاتا کڑد بھاز اہمیت تخک۔ ساڑی حکومت ملک اٹ بلدیاتی ادارہ غاتا نظام ءِ پین جوان کننگ نا خواہندار ءِ۔ دا خیال آتا درشانی ءِ اسپیکر قومی اسمبلی وزیر اعلیٰ خیبر پختونخواہ نا خصوصی آ کمامدار برائے بلدیات و دیہی شونداری کامران بنگش تون ہیت وگپ کرسا کرے، ہرا تدوک آ دے اوڑتون اوڑدہی کرے۔ ہراٹی خیبر پختونخواہ ٹی بلدیاتی ادارہ غاتا بحالی، وزارت بلدیات نا کنڈآن برجا انگا شونداری ڈٹ و ایلو ویل آتیا ہیت وگپ کننگا۔ اسد قیصر پارینے کہ اُلس نا آسراتی تیکن اختیار آتے شیفکو کہول آ اتنگ وزیراعظم عمران خان نا ویژن ءِ۔ تدوک آ دور اٹ خیبر پختونخواہ ٹی بلدیاتی ادارہ غاتا کارکڑد بھاز جوان مس۔ ملکی آبادی نا بھلو بشخ اس خلق آتیٹی رہنگک۔ خلقی آ علاقہ غاتا شونداری ملکی شونداری کن المی ءِ۔ اسد قیصر پارینے کہ ملک ءِ دا وخت آ کورونا دَین تون اوار ایلو ہرا چیلنج آک مون تروک ءُ اوفتے آ کنٹرول کننگ کن بنجائی و صوبائی حکومت آتا اواری ٹی کاریم کننگ المی ءِ۔ پارلیمنٹ اٹ ساڑی کل سیاسی جماعت آک اہم ءُ قومی ءُ اہمیت اسے نا معاملہ غا اسہ ہیت آ سلوک ءُ۔ صوبہ ٹی ساڑی تاریخی آ ہند و دود ربیدہ ئی گڑاک ملک انا کبین آ اثاثہ غاک ءُ۔ دود و ربیدہ ئی گڑاتا رکھ و تاریخی جاگہ غاتا زییائی آ جوان سجفنگے۔ اسپیکر خاص آ کمکار ءِ وابی ڈیویلپمنٹ اتھارٹی ءِ فعال کننگ نا پارت کرے۔ وزیراعلیٰ خیبر پختونخواہ نا خاص آ کمکار برائے بلدیات و دیہی شونداری کامران بنگش اسپیکر نا منتواری ءِ ہرفے و ایوان اٹ کارروائی ءِ غیر جانبداری وڑاٹ چلیفنگ آ اُونا کڑد انا ستا ءِ کرے۔ کامران بنگش پارینے کہ خیبر پختونخواہ حکومت بلدیاتی ادارہ غاتا نظام ءِ جوان کننگ و خلقی آ علاقہ غاتا شونداری آ خاص وڑاٹ سجفنگ انگ ءِ۔ ساڑی صوبائی بجٹ اٹ خلقی علاقہ غاتیٹی شونداری ڈٹ آتیکن بھلو کچ اسے ٹی فنڈ جتا کننگا۔ صوبہ ٹی بلدیاتی گچین کاری تا زوت اس اڈ تننگ صوبائی حکومت نا کاریم تیٹی اوار ءِ۔ کورونا وائرس وبائنا سوب آن صوبہ ٹی بلدیاتی گچین کاری پد تما۔