السی غاو تا وخت آ ایسری حکومت نا اولیت آتیٹی اوار ءِ،ڈپٹی کمشنر نصیر آباد

نصیرآباد، وزیراعلیٰ بلوچستان میر سرفراز خان بگٹی و چیف سیکرٹری بلوچستان شکیل قادر خان نا پرمان تا رد اٹ السی ویل آتا دمدستی ایسری، غاو تا چٹفنگ و سرکاری محکمہ غاتا کارکڑد ءِ الس نا مون اٹی پرسجوئی کننگ کن ضلع نصیرآباد نا تحصیل منجھو شوری ٹی ڈپٹی کمشنر نصیرآباد وریندر لعل نا کماشی ٹی غاو دیوان اڈ ہلک، ہراٹی مچ آ ضلع نا کل ضلعی محکمہ غاتا سروک و تعلقدار افسر آک بشخ ہلکر۔ غاو دیوان اٹی منجھو شوری و ایب کیب انا جتا علاقہ غاتیاں تعلقدار الس نا بھلو کچ اس بشخ ہلک و تینا پیش بروک ویل آتے زبانی و نوشتئی وڑ اٹ ڈپٹی کمشنر و تعلقدار محکمہ غاتا افسر آتا مون آ پیش کریر۔ داوخت آ شریدار آک امن ایمنی نا خراب حالیت، کشاری دیر انا تنکی‘ بجلی نا بھلا لوڈشیڈنگ، داڑیلی و دُزی نا ودوک آ واردات، بینظیر انکم سپورٹ پروگرام نا رد اٹ حقدار بندغ آتا سروے مفننگ و ایلو بنداوی السی ویل آتا نشاندہی ءِ کریر۔ ڈپٹی کمشنر وریندر لعل الس نا غاو تے بھاز سکوت اٹ خف تورے و تعلقدار محکمہ غاتا سروک آتے جاگہ غا ویل آتا ایسری کن المی پارت کرے۔ او کیہی غاو تیا جاگہ غا پرمان کرسا منہ ویل آتا دمدستی ایسری نا گام گیج کرے وخت اس کہ ایلو ویل آتا ایسری کن تعلقدار افسر آتے اولیتی بنداو تیا عملی گام گیج کننگ و پیشرفت ءِ پک کننگ نا پارت کرے‘ دا وخت آ ڈپٹی کمشنر پارے کہ ضلعی انتظامیہ ءِ الس ءِ مون تروک ویل آتیاں جوان سماءِ و السی غاو تا وخت آ ایسری حکومت نا اولیکو اولیت آتیٹی اوار ءِ۔ غاو دیوان تا اڈ تننگ نا بنداوی مسخت الس ءِ اوفتا درگہ غا تینا غاو تے پیش کننگ نا وارخواہی فراوان کننگ، تعلقدار محکمہ غاتے الس نا مون آ پرسجوئی کننگ و ویل آتا ایسری کن بھرم تروک حوال کننگ ءِ شون تننگ ءِ۔ او تعلقدار افسر آتیا زور شاغا کہ او السی غاو تے بیرہ رسمی کارروائی اس آخا بلکہ اوفتا ایسری کن سنجیدگی و زمواری نا درشانی ءِ کیر۔