بلوچستان اٹی ورنا تا نا نوکری تے کس ءِ بہا کننگ نا موکل تننگپک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان اٹی ورنا نا نوکری تے بہا کننگ نا موکل تننگپک، نوکری تا بہا کننگ نا شاہدیک پک مسر تو نئے وزیر اس بچک‘ نئے سیکرٹری اس‘ وخت اس کہ زموار آتا برخلاف بے کنڈ ہلوک جاست پاست آن پد کانود نا رِد اٹ سخت کارروائی کننگک۔ او پیدوار کرے کہ بلوچستان نا ورنا تا آخبت و اوفتا روزگار نا حق آ ہچ ءُ وڑ اسے نا سودا بازی ءِ منپنہ۔ وزیراعلیٰ میر سرفراز بگٹی دا ہیت ءِ سیکرٹریز کمیٹی نا دیوان نا کماشی ءِ کرسا کرے‘ ہراٹی صوبائی محکمہ غاتا کارکڑد‘ سالانہ شونداری پروگرام نا فزیکل و فنانشل پیش رفت، بھرتی تا عمل و جتا جتا انتظامی باندات آتا جاچ ءِ ہلنگا۔ دیوان اٹی صوبائی وزیر ڈٹ بندی و شونداری میر ظہور احمد بلیدی، وزیر خزانہ میر شعیب نوشیروانی، چیف سیکرٹری بلوچستان شکیل قادر خان تون اوار کل محکمہ غاتا انتظامی سیکرٹریک بشخ ہلکر۔ دیوان اٹی وزیراعلیٰ بلوچستان محکمہ جنگلات اٹی بھرتی تا بابت رسینگوک بے ضابطگی تا غاو تا سخت نوٹس ءِ ہلسا بڑزکو کہولی جاست پاست نا پارت کرے۔ او پارے کہ اگہ پک شاہدی و بے کنڈ ہلوک جاست پاست اٹ کس آ ڈوہ بیٹ مس تو زموار آک ہچ ءُ وڑ اسے ٹی سزاغان بچنگ کپسہ۔ میر سرفراز بگٹی پارے کہ او اولیکو دے آن پیدوار کریسس کہ بلوچستان اٹی ہچ ءُ نوکری اس بہا مفک و دا اصولی موقف آ صوبائی کابینہ نا باسک، چیف سیکرٹری بلوچستان و مچ آ حکومتی مشینری اسہ صف آٹو۔ او پارے کہ نوکری تا بہا کننگ و ہلنگ ءِ توننگ کن ہچ ءُ زوراس سگپنہ و بلوچستان نا ورنا تا حق آ ہچ ءُ سمجھوتہ اس کپنہ۔ وزیراعلیٰ افسر آتے پارے کہ حکومتی باندات آتے ٹی چیف منسٹر نا وڑ اٹ ای ہچ ءُ نیام تمنگ اسے سگتنٹ۔ او پارے کہ کنا ایلم ہم وخت اس ہم سیکرٹریٹ اٹی سرکاری یا جندی کاریم کن بتنے۔ چیف منسٹر سیکرٹریٹ آن کانود آن چپ کاریم کن اسہ افسر اسے ہم اپروچ کننگپک و اگہ سیکرٹری ءِ فون یا اپروچ کننگانے تو او پاش و خلیس آن وا واکدار فورم آ پاننگ کیک۔ داخس انتظامی واکداری آن پد ہم گڑاس سلے تو گورننس آ سوج چست مریک‘ او پیدوار کرے کہ حکومت اٹی میرٹ، شفافیت و کانود نا بالادستی آ ہچ ءُ سمجھوتہ اس مفک و اسہ بندغ اسے ہم جندی تعلقداری یا اثر و رسوخ نا بنداو آ سرکاری باندات آ زہم شاغنگ نا موکل تننگپک۔ میر سرفراز بگٹی پارے کہ افسر آتیا اودے پورو پت ءِ و او بود تخرہ و بلوچستان ءِ جوان انگا کسر آ دننگ کن بود تخرہ۔ او پارے کہ سیکرٹری تا کہول آ نوکری تا بہا کننگ نا دوبہ گمان آن چَپ و بڑزکو انتظامی عہدہ سے نا شان اف‘ ننے سیکرٹری تا نیت و مثبت کڑد آ ہچ ءُ شک اس اف ولے شیفکو کارندہ و ریکروٹمنٹ کمیٹی تا کارکڑد آ سخت چاروکی کننگ نا گرج ءِ۔ بلوچستان نا الس و پارلیمانی فورم آ کروک کمٹمنٹ و ننا سوگو ارادہ نا رد اٹ اسہ کہول اسے آ ہم ہچ ءُ بے ضابطگی اس اسل سگنگ مفک، ننے سیکرٹری تا شرف و عزت دوست ءِ و سیکرٹری تے ہم حکومتی پالیسی و پرمان تیا عمل کرسا شرفدار مروئی تمک۔