بنجائی انشورنس محتسب نا سالانہ رپورٹ ءِ صدر مملکت ءِ پیش کننگا

اسلام آباد: صدر مملکت ڈاکٹر عارف علوی بنجائی انشورنس محتسب نا کارکڑد انا ستاءِ کرسا انشورنس باندات آتیٹی انصاف نا فراوانی کن ادارہ نا کڑد انا بارواٹی آگاہی ودی کننگ نا گرج آ زور شاغانے۔ ایوان صدر نا پریس ونگ آن جاری بیان نا رداٹ صدر مملکت ءِ بنجائی انشورنس محتسب نا سالانہ رپورٹ سال 2022چارشنبے آ داڑے ایوان صدر اٹ پیش کننگا، بنجائی انشورنس محتسب ڈاکٹر محمد خاور جمیل رپورٹ ءِ پیش کرے۔ داوخت آ گپ وتران کرسا صدر پارے کہ الس ءِ انشورنس باندات آتیٹی اوفتا درگہ غا انصاف نا فراوانی ءِ ترند کروئی مریک۔ اوپارے کہ الس انشورنس پالیسی تا بابت غاوتا ایسری کن بنجائی انشورنس محتسب تون رجوع کے و انشورنس باندات آتیٹی انصاف نا فراوانی ٹی ادارہ نا کڑد انا بارواٹی آگاہی ودی کننگے۔ صدر مملکت بنجائی انشورنس محتسب نا سال 2022 نا کارکڑد انا ستاءِ کرے۔ بنجائی انشورنس محتسب سال 2022 نا رپورٹ اٹی پارے کہ 4634غاوتا ازالہ ءِ کننگا وخت اس کہ سال اٹی انشورنس پالیسی ہولڈرآتے 2.5 ارب روپئی نا ریلیف فراوان کننگا۔ رپورٹ اٹی مستی پاننگاکہ بنجائی انشورنس محتسب 95 درسد انشورنس کیس آتا ازالہ ءِ 60 دے اٹی کرے۔ رپورٹ اٹی پاننگاکہ مخلوق ءِ اوفتا درگہ غا انصاف نا فراوانی کن انشورنس محتسب سکھر و حیدر آباد اٹی پوسکن ءُ دفتر ملانے۔

(اے پی پی)