نقل نا توننگ و امتحانی مرکز آتیٹی آسراتی تے پک کننگک، شہک بلوچ

کوئٹہ : ڈپٹی کمشنر کوئٹہ شہک بلوچ پارینے کہ نقل انا توننگ و امتحانی سینٹر آتیٹی آسراتی تا فراوانی کن ہر وڑ نا گام گیج کننگک۔ تانکہ اومیت دار آک جوان ءُ چاگڑد اسے ٹی امتحان ایتر۔ نقل انا توننگ کن استاد خاص کر لمہ باوہ غاتے گام گیج کروئی تمک۔ تانکہ نقل آنبار انگا ناسور ءِ ماس آن کشسا تینا آخبت ءِ رکھوک کین۔ وخت اس کہ نقل کروک آتا برخلاف سخت کاروائی کننگے۔ دا بابت اٹ ہچ ءُ ڈیوالئی اس سگپنہ۔ دا خیال آتا درشانی ءِ کوئٹہ ٹی جتا جتا امتحانی سینٹر آتا دورہ نا وخت آ طالبعلم و استاد آتون ہیت وگپ کرسا کرے۔ او وخت آ او امتحانی سینٹر آتیٹی آسراتی، نقل انا تونگ نا بابت اٹ ہرفوک آ گام گیج، ای پیر نا چیکنگ و ڈیجیٹل حاضر سسٹم نا جاچ ءِ ہلک۔ ڈپٹی کمشنر کوئٹہ مستی پارینے کہ طالبعلم آک تینا ذہنی لائخی تیان کاریم ہلسا تعلیم آ جوان سجفر۔ و نقل آن تینا جان ءِ خلاص کیر۔ ہراڑان اوفک ملک و قوم انا خدمت ءِ کیر۔ او پارینے کہ نقل اسہ ناسور اسے ہرا ننا پوسکن آ چین ءِ جہالت نا تہارمہ ٹی دکہ تننگ اٹی ءِ۔ صوبائی حکومت و ضلعی انتظامیہ دا ناسور ءِ ایسر کننگ کن ہر وڑ نا کوشست کننگ اٹی ءِ۔ وخت اس کہ راج انا کل بندغ آتے اوار کرسا عملی ءُ جہد اس کرسا صوبہ نا چناتے نقل آن بچفسا اوفتے علم انا دولت ءِ ایتر۔ وخت اس کہ ننے دا وعدہ ءِ کروئی ءِ کہ نقل آنبار انگا لعنت نا ایسری ءِ کننگے و تینا چناتے خوانفسا اسہ باشعور ئپ شاری اس جوڑ کننگ اٹ اوفتا ہر وڑ نا راہشونی ءِ کیرہ۔

(خ ن)