نواز شریف نا ناجوڑی درو اس ئس، عدالت آ کانہ، فواد چوہدری

اسلام آباد (آن لائن) بنجائی حوالکاری و شینکاری وزیر فواد چوہدری پارینے کہ نواز شریف نا ناجوڑی پاش آن پاش درو اس ئس، شہباز شریف نواز شریف ءِ پیشن راہی کننگ نا فراڈ اٹ کمکار ئس۔ اونا برخلاف لاہور ہائی کورٹ اٹی درخواست دائر کینہ۔ عدالت آن خواست کینہ کہ شہباز شریف نواز شریف ءِ پدی اتے، یا گڑا اودے نابود گوندنگے۔ اسلام آباد اٹی بلدیاتی گچین کاری تے ای وی ایم نا کمک اٹ کرفنگک۔ لاک ڈاؤن ءِ سگنگ نا وڑ اٹ افن، اسکول آتے ہم بند کننگ کپنہ۔سانحہ مری بھاز ارمانی ءُ واقعہ اس ئس، حکومتی کہول آ بڑزکو کہولی جاست پاستی کمیٹی اس ٹہیفنگانے، کمیٹی ہفت دے ٹی رپورٹ ءِ جمع کرفک، دا ہیت آتے او اسلام آباد اٹی بنجائی کابینہ نا دیوان آن پد میڈیا تون ہیت و گپ کرسا کرے۔ حوالکاری وزیر پارے کہ پاکستان تحریک انصاف سیل سواتی بشخ ءِ شون تننگ نا کوشست کرینے، پنجاب حکومت سانحہ مری آ بڑزکو کہولی جاست پاستی کمیٹی اس ٹہیفینے، ہرا ہفت دے ٹی رپورٹ ءِ جمع کرفک۔ سانحہ مری ٹی کم و وَد 22 بندغ زوال مسر۔ بھلو کچ اسے ٹی برف بٹنگ نا سوب آن درخت آتا تمنگ آک روڈ آک بند مسر۔ او پارے کہ وزیر اعظم دا سانحہ غا ارمان کرینے، مری ٹی 5 گاڈی ٹی واقعہ پیش بس، وخت اس کہ گیشتری بندغ آک گاڈی تے اِلار و پند اٹ مونی ہنار۔ فواد چوہدری پارے کہ نن 13 پوسکن ءُ سیل سواتی ہند درستی راستی کرفینن، و ملک اٹی سیل سوات نا بے کچ وارخواہی ارے۔ کالام، ناران، سوات و ایلو ہند آتیا سیلانی تا رش ءِ۔ او پارے کہ وزارت داخلہ نا رد اٹ اسہ لکھ 64 ہزار گاڈی مری ٹی پترینگاسر۔ کمامدار آک بایدے اسہ خاص ءُ وارننگ اس جاری کروسر۔ مری ٹی مرک آک کاربن مونو آکسائیڈ نا سوب آن مسر۔ مسکوہی وزیراعظم نواز شریف نا پدی بننگ نا بابت حوالکاری وزیر نا پاننگ ئس کہ نواز شریف پاش آن پش حکومت تون درو کرے و شہباز شریف نا شخصی ضمانت آ ملک آن پیشن ہنا۔ نواز شریف نا ناجوڑی نا ہرا چم ءِ کننگا، او راست اَلو۔ بنجائی وزیر پارے کہ جعلی بیان حلفی جمع کرفنگ آ شہباز شریف نا نابودی و اونا بٹنگ انگ کن اٹارنی جنرل لاہور ہائیکورٹ اٹی درخواست دائر کیک۔ شہباز شریف نواز شریف ءِ پیشن راہی کننگ نا فراڈ نا زموار ءِ۔ شہباز شریف عدالت تون دروغ تڑے یا تو او نواز شریف ءِ پدی اتے، یا گڑا عدالتی کارروائی ءِ مون ایتے۔ نن اِرا وار پاکستانی ہائی کمیشن تون حالی حوالی مسن کہ ننے نواز شریف نا میڈیکل رپورٹ ءِ تننگے، ولے شریف خاہوت رپورٹ ءِ شیئر کننگ آن نمن مس۔ نواز شریف 17 تُو آن لندن اٹی تولوک ءِ، ولے او اوڑے درمان کرفتنے، او پیشن ملک تولوک کانود آ ملنڈ کننگ اٹی ءِ۔