چیئرمین پی ٹی آئی عمران خان نیب انا وارنٹ آ دزگیر

اسلام آباد/لاہور : قومی احتساب بیورو (نیب) رینجرز ناکمک اٹ پاکستان تحریک انصاف ناچیئرمین عمران خان ءِ دزگیر کرے۔ عمران خان اِرا مقدمہ ٹی ضمانت ہلنگ کن وہیل چیئر آ اسلام آباد ہائی کورٹ اٹ پیش مننگ کن بسوسس‘ ہراکان اودے عدالت نا کمرہ ٹی سر مننگ آن مست نیب راولپنڈی دزگیر کرے۔ عمران خان ءِ رینجر کمامدار آک دریر و اودے سخت سکیورٹی ٹی نیب راولپنڈی ٹی پیش کننگا‘ دا وخت آ اسلام آباد ہائیکورٹ نا پیشن آ سیکیورٹی ہائی الرٹ ئس و رینجر نا کارندہ غاک بھلو کچ اسے ٹی ساڑی ئسر‘ حوالی نا رد اٹ قومی احتساب بیورو (نیب) پی ٹی آئی نا چیئرمین عمران خان ءِ القادر ٹرسٹ کیس اٹ دزگیر کرینے‘ نیب کمامدار آتتون عمران خان ءِ دزگیر کننگ نا وارنٹ ساڑی ئس۔ عمران خان نا دزگیری نا وارنٹ چئیرمین نیب انا دستخط اٹ جاری مس۔ آئی جی اسلام آباد نا رد اٹ دزگیزی آن مست عمران خان ءِ وارنٹ نشان تننگا‘دابابت آئی جی اسلام آباد پارے کہ عمران خان ءِ القادر ٹرسٹ کیس اٹ دزگیر کننگانے‘ حالیت آک مست آنبار ءُ‘ اسلام آباد اٹ دفعہ 144 نافذ ءِ‘ خلاف ورزی کننگ آ کارروائی کننگک‘ کس آ ہم ہچ ءُ بیداد اس کننگتنے۔ عمران خان ناگاڈی نا دارہ ایرہ غان پولیس سلوک ئس۔ عمران خان نا وکیل علی بخاری پارے کہ عمران خان بائیو میٹرک کرفنگ کن دائری برانچ ناپیشن آ ہناسس‘ ہراڑے بائیو میٹرک روم انا شیشہ غاتے پرغسااودے دزگیر کننگا۔ وکیل بیرسٹر گوہر دعویٰ کرے کہ رینجر عمران خان آ بیداد کرے‘ اونا کاٹم و ٹھپی آ نت آ خلنگا‘ اونا وہیل چیئر ءِ ہموڑے خسار۔ نیب پارینے کہ چیئرمین نیب لیفٹیننٹ جنرل (ر) نذیر احمد یکم مئی آ عمران خان نا دزگیری نا وارنٹ ءِ جاری کرے۔ القادر یونیورسٹی کیس اٹ عمران خان نا اُرائی بشری بی بی نیب انکوائری ءِ اسلام آباد ہائیکورٹ اٹ چیلنج کرینے۔ او درخواست اٹ چیئرمین و ڈی جی نیب راولپنڈی ءِ پڑک جوڑ کرسا موقف تینائی کرے کہ سیاسی مخالف آک بے کاٹم دوبہ غاتیا نیب جاست پاست نا بناءِ کرے۔ عدالت نیب انا انکوائری نا سرجم آتے فراوان کننگ نا پرمان کرے۔ القادر یونیورسٹی اسلام آباد نا خڑک آ سوہاوہ ٹی ءِ‘ دا ڈٹ القادر یونیورسٹی پروجیکٹ ٹرسٹ نا بشخ اسے۔ 5 مئی 2019ء آ ہمو وخت انا وزیراعظم عمران خان القادر یونیورسٹی نا بنداو ءِ تخاسس۔ دا یونیورسٹی کن نجی ہاؤسنگ سوسائٹی آن ڈغار ہلنگاسس۔ نیب دا کیس انا جاست پاست ءِ کننگ اٹی ءِ‘ ہندا رد اٹ پی ٹی آئی نا چیئرمین عمران خان ءِ نیب اسلام آباد ہائیکورٹ نا دنگ آن دزگیر کرے۔ ایلو کنڈآ پی ٹی آئی نا سینئر راہشون فواد چوہدری پارینے کہ مسکوہی وزیراعظم عمران خان ءِ عدالت آن برمتہ کننگانے‘ وکیل آتتون اوار لس بندغ آتیا بیداد کننگا۔ عمران خان ءِ نادرست بندغ آک ہرفسا نادرست ہند آدریر۔ پی ٹی آئی نا راہشون حماد اظہر پارے کہ 9 مئی نا دے عمران خان نا دزگیری نا آخا بلکہ پاکستان نا آجوئی نا دے پک مریک‘لاہور ناباتیک لبرٹی چوک آ بریر‘ بروک آ لائحہ عمل ءِ ہموڑے تننگک۔ حماد اظہر پارے کہ عمران خان نادزگیری ناوخت آ بیداد کننگ نا حوالک بننگ ءُ‘ اوپارے کہ عمران خان ننا ریڈ لائن ءِ‘ او ہچ ءُ گناس کتنے۔ ایلوکنڈآ اسلام آباد پولیس پارینے کہ اسلام آباد اٹ دفعہ 144 نافذ ءِ‘ کس آ ہم بیداد کننگ تنے۔ پی ٹی آئی نا راہشون مسرت چیمہ پارے کہ عمران خان نن کن جنگ تسکہ‘ داسہ دا ننا 23 کروڑ الس نا کٹنگ با تننگ نا ٹیسٹ ءِ‘ ملک اناکل آن بھلا لیڈر ءِ عدالت آتیان ہرفنگانے۔

(آن لائن)