سرکاری ملازم آتا بلوچستان ہائیکورٹ نا پرمان آ دھرنا ءِ چٹفنگ نا پڑو

0

Get real time updates directly on you device, subscribe now.

عدالت ملازم آتا 18 ٹِک آ حکومت ءِ مذاکرات کننگ نا پارینے،حکومت عدالتی پرمان آن پدی مننگ کپک،گلوبل استاد آک پکا مسنو،گرینڈ الائنس راہشون

کوئٹہ(مانیٹرنگ ڈیسک) سرکاری ملازم آک دھرنا ءِ چٹفیر، اینو آن امتحان تے ہلنگ نا ہم پڑو۔ سرجم حوال آتا رد اٹ تدوک آ 12 دے آن برجا گرینڈ الائنس نا دھرنا ہائی کورٹ نا فیصلہ غان پد ختم کننگ نا پڑو کننگا۔ دا پڑو ءِ سرکاری ملازم آتا راہشونک برانزی مچی آن تران کرسا کریر۔ او پارے کہ نن چیف جسٹس نا بھروسہ غا حکومت ءِ بیرہ اسہ تُو اسے نا الٹی میٹم تننگ اٹی اُن۔ روچہ مبارک آن پد اگہ تنخواہ تیٹی ودکی متو تو اسہ وار ولدا برانزی تحریک چلیفنہ۔ بلوچستان ایمپلائز اینڈ ورکرز گرینڈ الائنس بلوچستان ہائی کورٹ نا پرمان آن پد 12 دے آن برجا دھرنا ءِ چٹفے۔ جمعہ نا دے بیگہ تون بلوچستان ہائی کورٹ نا پرمان آن پد بلوچستان ایمپلائز اینڈ ورکرز الائنس کوئٹہ نا عبدالستار ایدھی چوک آ برجا دھرنا ءِ چٹفنگ نا پڑو کرے۔ دھرنا نا ایسری نا پڑو ءِ کرسا بیوگا نا کنوینئر عبدالمالک کاکڑ، داد محمد بلوچ، حبیب الرحمن مردانزئی، عبدالسلام زہری، ماما سلام بلوچ تون اوار ایلوفک پاریر کہ حکومت ءِ خواست آتے پیش کرین، ہرافتے امنا کپننگ آ مجبور مرسا کوئٹہ ٹی دھرنا تسن۔ ملازم آک پبی وڑ اٹ حکمران آتتون مون تسر۔ او پاریر کہ عدالت ملازم آتا 18 ٹِک آ حکومت ءِ مذاکرات کننگ نا پارینے۔ داسہ حکومت عدالتی پرمان آن پدی مننگ کپک۔ پرمان ملازم آتا سرسہبی ءِ۔ اوفک پاریر کہ گلوبل پارٹنر شپ استاد آتے پکا کننگانے۔ اوفتے مبارک مرے۔ او پارے کہ اگہ عئید اسکان ننا خواست آک امنا متوس تو اسہ وار ولدا برانز نا کال ایتنہ۔ اوفک پاریر کہ باور کرفنگانے و است جم اُن، نن اینو تینا دھرنا ءِ پد بٹنہ۔ و ننا و برانز خواست آتا منظوری اسکان برجا سلک۔

Get real time updates directly on you device, subscribe now.

Leave A Reply

Your email address will not be published.