الس نا غاو، وزیر اعلیٰ بزنجو نا سبزل روڈ نا دورہ، کاریم مفننگ نا نوٹس

کوئٹہ: وزیراعلیٰ بلوچستان میر عبدالقدوس بزنجو السی غاو تیا سبزل روڈ نا دورہ ءِ کرے، صوبائی وزیر جانجوڑی سید احسان شاہ ہم اوڑتون اوار ئسکہ۔ وزیراعلیٰ بیدس پروٹوکول و سیکیورٹی آن سبزل روڈ آ سر مس۔ وخت اس کہ وزیراعلیٰ نا دورہ کن نئے روٹ خلنگا، و نئے ٹریفک ءِ توننگا۔ وزیراعلیٰ سڑک نا تفنگ نا کاریم اٹ ہُرے مننگ آن علاقہ ٹی ودی مروک بدحالی تا جاچ ءِ ہلک۔ وزیر اعلیٰ علاقہ ٹی رہینگوک آتتون مِلا، و اوفتے تعمیراتی کاریم اٹ ہُرے مننگ و دیر کشنگ نا نظام نا بدحالی نا بابت ویل آتیان معلومدار کرے، مخلوق نا کنڈ آن غاو تا ڈیمبری خلنگا۔ او پاریر کہ تدوک آ مون سال آن کوئٹہ پیکیج نا پن آ روڈ ءِ ختانو اِلانو۔ ایب کیب انا گلی تیٹی نالی نا گند تموک ءِ، و مخلوق مسیت اسکان ہم ہننگ کپک، شاری تا پاننگ ئس کہ تدوک آ حکومت سبزل روڈ نا تفنگ و بھلنی نا کریڈٹ ءِ تو ہلک، ولے ڈغار آ کاریم کتو، وزیر اعلیٰ علاقہ نا حالیت آ بھاز ترند مس، و پارے کہ کل جوان مننگ نا رپورٹ آتیا پت کپرہ۔ ہندا سوب آن حالیت آتا ہُننگ کن تینٹ بسنٹ۔ وزیراعلیٰ پارے کہ علاقہ نا حالیت نا زموار کمامدار آتا برخلاف کارروائی کننگک، او پارے کہ سوشل میڈیا ٹی فوٹو نا ایلو مون ءِ نشان ترسا کریڈٹ ہلنگ آسان ءِ، ولے ڈغار آ کاریم مف تو مخلوق نا ویل آک ودرہ۔ وزیراعلیٰ پارے کہ ڈٹ بندی و مانیٹرنگ نا کاختی نا سوب آن سبزل روڈ نا تعمیر سلوک ءِ، ولے ڈٹ اٹی ودی مروک عیب آتے اینک کننگ انگ ءِ و حالیت آک دمدستی جوان مریرہ۔ وزیراعلیٰ ایڈمنسٹریٹر کیو ایم سی ءِ دیر کشنگ کن جنگی بنداو آ گام گیج کننگ و پی ڈی کوئٹہ پیکیج ءِ روڈ انا تفنگ نا کاریم ءِ دمدستی بنا کننگ نا پارت کرے۔ وزیراعلیٰ پارے کہ اِرا دے آن پد دوارہ علاقہ نا دورہ ءِ کیوہ، علاقہ نا شاریک دمدستی گام گیج نا پرمان آ وزیراعلیٰ نا منت ءِ ہرفسا پاریر کہ نا السی فائدہ و آسراتی کن کروک کاریم تا سوب آن الس نے آن بھلو اومیت کیک۔ وزیراعلیٰ پارے کہ الس نا است خواہی تے پورو کینہ۔ کمامدار آتا نابودی و ڈیوالئی تے سگپنہ۔ افسر آک تینے الس نا خذمتگار تکر۔ وزیراعلیٰ ہزارہ ٹائون کلی کرانی و دیکی بائی پاس نا ہم دورہ ءِ کرے، او دیکی بائی پاس نا بھلنی نا ڈٹ انا سلنگ نا ہم نوٹس ءِ ہلک، او پارے کہ کاریم تا پد تمنگ نا زمواری این ایچ اے آ بریک، دا رد اٹ وزیر اعظم تون ہیت کیوہ۔