دہشت گرد آتے دوارہ کاٹم ہرفنگ کن الیپنہ، آرمی چیف
دہشت گرد آتے دوارہ کاٹم ہرفنگ کن الیپنہ، آرمی چیف
راولپنڈی: سپہ سالار جنرل قمر جاوید باجوہ پارینے کہ نن دہشت گردی نا برخلاف اسہ بھلو پند اس کرینن، دہشت گرد آتے دوارہ کاٹم ہرفنگ کن الیپنہ، دہشت گرد آتا بچوک، اوفتا کمکار و سنگت آتے امر کہ مرے چٹفنہ۔ پاک فوج نا حوالکاری بشخ (آئی ایس پی آر) نا رد اٹ آرمی چیف جنرل قمر جاوید باجوہ نا کماشی ٹی 247می کور کمانڈر کانفرنس جی ایچ کیو راولپنڈی ٹی اڈ ہلک، کانفرنس اٹ بشخ لوک آتے ملک اٹی سیکورٹی نا حالیت خاص وڑ اٹ بلوچستان اٹی مروک داسہ نا واقعہ غاتا بابت سرجم حوال تننگا۔ بشخ ہلوک آتے پاکستان نا نزور کننگ نا جارحانہ کوشست آتا مون ءِ توننگ کن گام گیج آتا بابت ہم حوال تننگا۔ کور کمانڈر کانفرنس اٹی ملک انا رکھ اکن تینا جان تے ندر کروک آ شہید آتے خراج عقیدت پیش کننگا۔ وخت اس کہ بلوچستان اٹی داسہ نا دہشت گرد جلہو آتے بے سہب کننگ و دہشت گرد آتے بھلو نسخان اس رسیفنگ آ سکیورٹی فورس آتے خراج تحسین پیش کننگا۔ دا وخت آ آرمی چیف فارمیشن آتا آپریشنل تیاری و دشمن تا ناپاک انگا ارادہ غاتے مش تا کننگ کن کروک گام گیج آتیا است جمی نا درشانی کرے۔ آرمی چیف پارے کہ نن دہشتگردی نا برخلاف بھلو جنگ اس کرینن، افواج پاکستان قوم انا مخ تفی اٹ ہر رنگ و نسل نا دہشت گرد آتا برخلاف سرسہب کارروائی کرینے،دہشت گرد آتے دوارہ کاٹم ہرفنگ کن کروک کوشست آتے سرسہب مننگ کن الیپنہ،آرمی چیف پارے کہ نن دہشت گرد آتا بچوک، اوفتا کمکار و سنگت آتے امر کہ مرے چٹفنہ۔ آرمی چیف کل فارمیشن آتے پارت کرے کہ روایتی و غیر روایتی حالیت آتیٹی آپریشن نا سرسہبی ءِ پک کننگ کن بنداوی فوجی ہیلکاری نا بڑزکو کہولی آب ءِ برجاتخنگ آ چکار کننگے۔