18می ترمیم اٹ بدلی ملکی سلامتی ءِ گڑتی تا باٹی ایتک، مولانا فضل الرحمن

جیکب آباد(آن لائن) جمعیت علمائے اسلام نا کماش مولانا فضل الرحمن پارینے کہ ہژدہ می آئینی ترمیم اٹ بدلی ملکی یکجہتی و سلامتی کن خطرناک مریک، بنجا نا آئینی زمواری تے صوبہ غاتیا بیٹ کننگ غلط ءُ کاریم اسے، دا خیال آتا درشانی ءِ او جے یو آئی ضلع جیکب آباد نا امیر ڈاکٹر اے جی انصاری نا ایلم ڈاکٹر عبدالکریم انصاری نا کزیت آ ہڑزخواہی آن پد جامعہ مدنیہ ٹی جے یو آئی نا ڈل اتون ہیت وگپ کرسا کرے، او وخت آ قائد سندھ علامہ راشد محمود سومرو، درگاھ امروٹی شریف نا سجادہ نشین و صوبائی نائب امیر سید سراج احمد شاہ امروٹی،بنجائی نائب امیر مولانا عبدالقیوم ھالیجوی،صوبائی جوائنٹ سیکرٹری مولانا عبداللہ مہر، صوبائی ناظم مفتی سعود افضل ھالیجوی، مولانا عبداللہ پہوڑ و ایلوفک ساڑی ئسر، مولانا فضل الرحمان مستی پارینے کہ معاشی بدحالی خراب ءُ جاگہ اس سر مسنے، حکومت کیہی ویل آتا گواچی ءِ، مستی پارینے کہ ملکی و اُلسی ویل آتیٹی کمتی نا جاگہ غا ودکی مسنے، روپئی نا قدر پین شیف تمانے، صنعت آک بند و روزگار خراب ءُ حالیت اسے آ سر مسنے، زرگزران، معاشرت بھسکاری آن خڑک ءُ، مستی پارینے کہ ادارہ غاتا پرائیویٹائز کننگ آن جوانی بفک وخت اس کہ ادارہ غاتا انتظام ءِ جوان کننگ آن کٹ اٹ ودکی مننگ کیک۔ او جے یو آئی نا سینیئر راہشون مولانا علی شیر بروہی نا ایلم و جی یو آئی ضلع جیکب آباد نا ناظم حافظ محمد عباس نوناری نا کزیت آ اونا مار عبیداللہ نوناری تون ہڑزخواہی کرے، یات سلے کہ جے یو آئی نا کماش مولانا فضل الرحمن سندھ انا اسہ ہفتہ سے نا دورہ غاٹے۔ او سندھ انا ڈویژنل کہول آ کمامدار آتا دیوان تیٹی ہم بشخ ہلنگ اٹی ءِ او 9 جولائی آ کراچی ٹی 18 میکو آئینی ترمیم، این ایف سی ایوارڈ، ملک و سندھ انا ایلو اہم انگا ویل آتیا آل پارٹیز کانفرنس اٹ بشخ ہلیک ہراٹی کل تنظیم تا راہشون تے بٹنگ انگانے۔