اشتافی افن، پرمان مس تو عمران خان ءِ دزگیر کننگک، حکومت
نن خوانہ کہ پشی و ہل انا گوازی منہ دے برجا سلے، امریکی سازش آن بنا مروک کِسہ نت دُو تیا تمنگ اسکان سر مسنے، ڈی جی آئی ایس آئی نا تعیناتی وزیراعظم نا واکداری ءِ، وزیر دفاع خواجہ آصف
اسلام آباد : وزیر دفاع خواجہ آصف پارینے کہ عدالت پرمان کیک تو بایدے عمران خان ءِ دزگیر کننگے‘ نن اودے دزگیر کننگ کن اشتافی افن‘ خوانہ کہ عمران خان ہراگوازی ءِ کننگ اٹی ءِ او پین برجا سلپ، امریکی سازش آن بنا مروک کسہ نت دو تیا تمنگ اسکان سرمسنے۔ عمران خان عدالت آتے ٹی پیش مفرسا منفی ءُ وڑ اس مون آ ایسنے‘ دا بندغ اسٹیبلشمنٹ نا کمک آن بیدس اسہ ساہت اس ہم سیاست کتنے۔ اسلام آباد اٹ پریس کانفرنس کرسا خواجہ آصف پارے کہ دوحہ معاہدہ نا رد اٹ اوغانستان پابند ءِ کہ اونا ڈغار دہشت گردی نابرخلاف کاریم اٹ بفک‘ دا بابت نن ہنان وزورشاغان کہ او ہمو معاہدہ ءِ پورو کیر و دانا مون ءِ توننگ کن اوفتے سلاہ ہم تسن۔ او پارے کہ داکان مست ہم نن دہشتگردی نا برخلاف جنگ کرین و اونا مون ءِ تورین‘ دا وار ہم مچ آ قوم سیوت کرسا دہشت گردی ءِ چٹفنہ۔ اوغانستان نا ڈغار بایدے پاکستان نابرخلاف کاریم اٹ بف۔ دہشتگردی نا زوت آتیٹ مروک واقعہ غاتے ٹی نہادی جان تا زیان مننگ آ ارمان مسنے۔ کابل اٹ اوغان عبوری حکومت تون ہیت مسنے۔ اوغانستان نا دورہ ناوخت آ ننے بھاز جوان ءُ رسپانس رسینگا‘ دہشگردی نا برخلاف پاکستان پبی جنگ کرے و سرسہبی دوئی کرے‘ منہ بندغ فیصلہ کریسر کہ امریکہ نا جنگ ءِ ننے کروئی ءِ‘ نن خاخر ءِ تینا اُراٹی ایسونن‘ دا جنگ اٹ ننا فوجی تتون اوار ہر تپّہ نا بندغ آک قربانی تسنو۔ او پارے کہ عمران خان عدالت آتے ٹی پیش مفرسا راگ کننگ اٹی ءِ۔ نواز شریف سَد آتا حساب اٹ پیشی تس‘ عدالت آتے ٹی پیش مس۔ میاں نواز شریف وخت اس ہم عدالت آتا بے حرمتی ءِ کتنے‘ نن عدلت آتے شرف ایتنہ‘ دا بندغ آک ابن الوقت ءُ دا جیل آن خلیرہ، ذوالفقار علی بھٹو پاہو کنگ ولے او عدالت آتے ٹی پیش مس‘ آن ریکارڈ ءِ اونا عدالتی خون مس‘ عدالت آتے ٹی پیش مفرسا عمران خان منفی وڑ اس مونی ایسنے‘ سیاستدانک عدالت آتے ٹی پیش مریرہ ٹی وی آ ہوغپسہ پٹپسہ۔ ای اوفتے سلاہ ایتوہ کہ مچٹ جیرت و حوصلہ نوازشریف آن خوار ہرانا مچ آ خاہوت جیل آ ہنانے۔ اگہ عدالت ناپرمان مریک تو بایدے عمران خان ءِ دزگیر کننگے‘ دا بندغ منہ دے آن راگ کننگ اٹی ءِ۔ ننے عمران خان ءِ دزگیر کننگک ن اشتاف اف‘ حکومت صبر آن کاریم ہلنگ اٹی ءِ ولے نی دزگیر ہم مریسہ و نا برخلاف کانود نا وڑ اٹ کارروائی ہم مریک۔ خوانہ کہ ہل و پشی نا گوازی منہ دے پین برجا سلے۔اوپارے کہ ای عدالت آتیان خواست کیوہ کہ مستین ایلو سیاستدان تیانبار داسہ عمران خان تون ہم کانود نا وڑ اٹ باندات کننگے‘ بایدے دا تاثر رسینگپ کہ عمران خان ءِ ڈھیل تننگ انگ ءِ۔
(آن لائن)