لس گچین کاری تے 90 دے ٹی کرفنگ کپنہ، الیکشن کمیشن

اسلام آباد : الیکشن کمیشن آف پاکستان لس گچین کاری تے 90 دے اٹ کرفنگ آن بشخنداری کرینے و صدر عارف علوی آ راہی کروک چٹھی ٹی پارینے کہ ساف و شفاف گچین کاری تیکن الیکشن کمیشن ئِ پین چار تُو درکار مریک و دا حالیت آتے ٹی گچین کاری تے اکتوبر 2022 اٹ کرفنگ مریک۔ الیکشن کمیشن ناکنڈآن ایوان صدر آ راہی کروک چٹھی ٹی پاننگانے کہ الیکشن کمیشن اسہ وتواجہ‘ آجو و آئینی ءُ ادارہ اسے واو آئین نا آرٹیکل218 نا شیفکو ٹک 3 نا رد اٹ گچین کاری تے کرفنگ ئِ مقدس ءُ فرض اس سرپند مریک و داڑکن المی ئِ کہ کل بست وبند آتے کننگے تاکہ گچین کاریک ایمانداری، انصاف، شفاف وڑ اٹ کانود نا رد اٹ مریر و اوفتے ٹی ہچ ءُ وڑ اسے نا بے ایمانی مف۔ گچین کاری تا بابت حلقہ بندیک اسہ بنداوی ءُ گام اسے ءُ و دا حلقہ بندی تے مردم شماری نا بنداو آ کننگک۔ ششمیکو قومی مردم شماری 2017 نا عبوری نتیجہ 3 جنوری 2018 آ شینک کننگار و الیکشن کمیشن دانا رد اٹ قومی و صوبائی اسمبلی نا حلقہ غاتے ٹی حلقہ بندی کننگا‘ چٹھی ٹی مستی پاننگانے کہ بروک آ لس گچین کاری تیکن المی ئِ کہ مردم شماری نا پک نتیجہ شینک مرے و دا رد اٹ الیکشن کمیشن کیہی وار کوشست کرے۔ چیف الیکشن کمشنر 7 مئی2020 آ وزیر اعظم آ چٹھی نوشتہ کرے‘ دا بابت وزارت کانود و انصاف آ ہم چٹھی نوشتہ کننگا، وزارت پارلیمانی امور، ادارہ شماریات، سیکرٹری سینیٹ، سینیٹ قومی اسمبلی آ ہم چٹھی نوشتہ کننگا‘ آئین اٹ 25 می ترمیم آن پد فاٹا ئِ خیبر پختونخواہ ٹی اوار کننگا ہرانا رد اٹ فاٹا نا 12 نشست کم مرسا 6 سلیسر و ہندا وڑ قومی اسمبلی ٹی جنرل نشست آتا کچ 272 آن کم مرسا 266 مس۔ ہندا سوب آن خیبر پختونخوا ٹی پوسکن آ حلقہ بندیک المی ءُ ولے پاکستان بیورو شماریات ناکنڈآن مردم شماری نا پک نتیجہ ئِ شینک کپننگ ناسوب آن مننگ کتو۔ چٹھی ٹی مستی پاننگا کہ مشترکہ مفادات کونسل ششمیکو مردم شماری نا نتیجہ غاتا منظوری ئِ تسنے و الیکشن کمیشن قومی و صوبائی اسمبلی تیکن پوسکن آ حلقہ بندی تا عمل آ کاریم نا بنائِ کرینے‘ ہندا دے تے ٹی حکومت پوسکن آ ڈیجیٹیل مردم شماری کرفنگ ناپڑو کرے ہراناسوب آن حلقہ بندی تا عمل ئِ الیکشن کمیشن اٹ توننگا ایہن تو دانا شیڈول منظور کننگانے‘ دا حالیت آتے ٹی وزارت پارلیمانی امور آ اِرا چٹھی نوشتہ کننگا کہ او ڈیجیٹل مردم شماری نا نتیجہ ئِ 2022 انا اخیر اسکان پورو کے تاکہ حلقہ بندی تا عمل مارچ 2023 اسکان پورو مرے‘ ولے الیکشن کمیشن ئِ وزارت پارلیمانی امور آن ہچ ءُ ورندی اس رسینگتو ہرانا سوب آن حلقہ بندی تا عمل اٹ پین ہُرے مس‘ الیکشن کمیشن بروک آ گچین کاری تے کرفنگ کپک داڑکن بنجائی حکومت و صوبائی حکومت آتا اوار تولنگ المی مریک و حلقہ بندی تا عمل اٹ ہُرے نا زموار بیرہ کمیشن گوندنگ مفک انتئے کہ بنجائی و صوبائی حکومت آک دا وڑ انا امور تیا الیکشن کمیشن تون کمک کننگ ناپابند مریرہ‘ چٹھی نا اخیر اٹ پاننگانے کہ کمیشن گچین کاری تیکن پرعزم ئِ ولے اودے پین 4 تُو درکار مریک تاکہ حلقہ بندی تا عمل پورو مرے و اکتوبر 2022 اٹ شفاف و آجو گچین کاریک مننگ کیرہ۔ الیکشن کمیشن دا مچ آباندات آ صدر مملکت ئِ بریفنگ تننگ کن اوڑان وخت ہم خواہسنے۔