کرکی پٹی آ آباد آبادی تے کن سونامی نا بابت شعور و آگاہی المی ءِ،وہاب مجید
قدرتی آفت آتا دے تیٹی وخت آ فیصلہ و جوان ءُ گام ہرفنگ نہادی انسان تا جان تے بچفنگ کیک
Get real time updates directly on you device, subscribe now.
گوادر، سونامی آن آگاہی نا جہانی دے آ ضلعی انتظامیہ، محکمہ تعلیم و رورل کمیونٹی ڈویلپمنٹ کونسل (RCDC) نا اسیجائی کمکاری اٹ گورنمنٹ گرلز ہائی اسکول گوادر اٹی سونامی آن بچنگ و رکھی گام گیج آتتون تعلقدار آگاہی سیشن اڈ ہلک‘ سیشن اٹی ڈسٹرکٹ آفیسر ایجوکیشن وہاب مجید، ڈسٹرکٹ پروگرام آفیسر RCDC عبداللہ عثمان و آر سی ڈی نا سینئر جوائنٹ سیکرٹری نیاز ابراہیم طالب علم و استاد آتے سونامی نا گمانی گڑتی‘ قدرتی انتباہی نشانی، وخت آ پیش تمنگ و ہلہلہ ئی حالیت آتیٹی انسانی جان تا رکھ کن المی رکھی گام گیج آتیاں معلومدار کریر۔ ترانکار آک پاریر کہ گوادر تون اوار بلوچستان نا کرکی پٹی آ آباد آبادی تیکن سونامی تون تعلقدار شعور و آگاہی المی ءِ۔ سمندر اٹ زمی جمب آن پد سمندر نا دیر اٹی گمان آن چَپ چولی و ریل گاڑی یا جیٹ طیارہ غانبار انگا توار سونامی نا گمانی قدرتی انتباہی نشانی تیٹی اوار ءُ۔ دا وڑ انا نشانی مننگ آ دمدستی وڑ اٹ رکھوک و بڑزکو ہند آتیا ہنوئی تمک و سمندر نا دیر انا گمان آن چَپ پدی ہننگ یا سمندر نا کہول آ گمان آن چَپ بدلی سونامی نا گمانی قدرتی نشانیک ءُ۔ دن انگا نشانی خننگ انگ آ سرکاری پڑو نا انتظار ءِ کپرسا دمدستی وڑ اٹ کرک آن مُر و بڑزکو رکھوک ہند آتا کنڈ آ ہنوئی تمک۔ سیشن اٹی شریدار آتے پاننگا کہ سونامی نا حالیت اٹی رکھوک پیش تمنگ نا کسرتا مہالو آن نشاندہی، ہلہلہ ئی ڈٹ بندی، خاہوت نا بندغ آتیکن رابطہ نا وڑوڈول‘المی گڑاتا تیاری و سرکاری پارت آ عملدرآمد انسانی جان تا رکھ اٹی بنداوی اہمیت تخرہ۔ او دا ہیت آ زور شاغار کن سونامی نا چولی تا نیام اٹی کرک‘ بندرگاہ و کرکی شیفکو علاقہ غاتیان مُر سلنگ و خطرہ نا پورو وڑ اٹ چٹنگ اسکان رکھوک ہند آ رہینگ المی ءِ۔ ترانکار آک پاریر کہ تعلیمی ادارہ غاتیٹی دن انگا آگاہی پروگرام تا بست وبند طالب علم و استاد آتے قدرتی آفت آتتون مون تننگ کن تیار کننگ تون اوار دا شعور ءِ اُرا و مچ آ کرکی علاقہ غاتا بندغ آتسکان رسیفنگ اٹی ہم اہم کڑد ادا کیک۔