صحافی تے تروک دھڑکو تا نوٹس ءِ ہلسا دمدستی کارروائی کننگے‘نوشکے پریس کلب

نوشکے (تلار حوالکار) نوشکے پریس کلب نا صحافی تا ہلہلہ ئی دیوان پریس کلب نوشکے نا ماڑی ٹی اڈ ہلک‘ ہراٹی صدر پریس کلب نوشکے مالک عدیل مینگل، بزرگ صحافی حاجی سعید بلوچ، جنرل سیکرٹری ظہور بلوچ، مسکوہی صدر برکت زیب سمالانی، مسکوہی صدر حاجی طیب یلانزئی، مسکوہی صدر شاہ نذر بادینی و سینئر صحافی ظہور گل جمالدینی اسک ساڑی ئسر۔ دیوان اٹ ہندی اِرا ٹھیکیدار خان خلجی، ظفر مینگل و پیٹی ٹھیکیدار نا کنڈآن نوشکے پریس کلب نا سینئر صحافی ومسکوہی صدر غلام رسول جمالدینی ءِ راستکی تے بیان کننگ آ اونا کیمرہ ءِ پرغنگ و خلنگ نا دھڑکو تننگ نا جاچ ءِ ہلنگا و ٹھیکیدار آتا کنڈآن صحافی ءِ دھڑکو تننگ نا مذمت ءِ کرسا پاننگا کہ صحافی تے اوفتا کسبی کسب آن زور اٹ توننگ مفک۔ دیوان اٹ 8 باسکی کمیٹی ہم ٹہیفنگا۔ ہرا انتظامیہ تون اوار محکمہ غاتتون اوڑدہی کرسا دا باندات آن معلومدار کیک۔ دیوان اٹ کمشنر رخشان ڈویژن، ڈپٹی کمشنر، ایس پی نوشکے پولیس،کمانڈنٹ نوشکے ملیشیائ، اسسٹنٹ کمشنر، ایس ایچ او نوشکے ایلو کانود نافذ کروک آ ادارہ غاتیان خواست کننگانے کہ او صحافی تے تروک دھڑکو تا نوٹس ءِ ہلسا دمدستی کارروائی کننگے۔