راشن بشخنگ ءِ شفاف کننگ کن مست آن ساڑی ڈیٹا غان کمک ہلنگک، کمشنر قلات

کوئٹہ (خ ن) کمشنر قلات ڈویژن حافظ محمد طاہر پارینے کہ چیف منسٹر راشن پروگرام نا رد اٹ قلات ڈویژن نا غٹ ضلع غاتا ضرورت مند آتے ٹی راشن بشخ وپانٹ کننگ نا عمل نا بناءِ کننگانے۔ ڈپٹی کمشنر‘ سیاسی و راجی تپہ غاتے متحرک کرسا مرحلہ وار غٹ حقدار آتے ٹی راشن بسخنگ نا عمل ءِ برجا تخنہ۔ راشن بشخنگ نا عمل ءِ شفاف کننگ کن مست آن ساڑی حقدار آتا ڈیٹا غان ہم کمک ہلنگک۔ وزیراعلیٰ بلوچستان باور کرفینے کہ اسہ ضرورت مند اس ہم کمک آن محروم مفک۔ کمشنر قلات ڈویژن پارے کہ بنجائی حکومت ہم احساس پروگرام نا رد اٹ ضرورت مند آتا کمک کن گام گیج کننگ اٹی ءِ‘ دابابت بندغ آتے ٹی شعور ودی کننگ ناگرج ءِ کہ بیرہ ہمو بندغ آک کمک ہلنگ نا کوشست کیر ہرافک زرگزرانی وڑ اٹ نزور و کمک ہلنگ نا حقدار مریر۔او پارے کہ آزمائش نادا وخت اٹ اللہ پاک ءِ راضی کننگ نا وخت ءِ۔ حکومت اخس کوشست کے ولے دا کمک کم مریک‘ نن تینا خڑک انا ضرورت مند آتا کمک ءِ کرسا اللہ پاک ءِ راضی کین۔ او پارے کہ لاک ڈاﺅن اٹ قلات ڈویژن نا الس جوان کمک کرے ہراڑا غٹ سیاسی، قبائلی و راجی بندغ وپوریاگر تنظیم تا منتوار ان۔ داوخت آ جتا جتا راجی تنظیم آک ہرا وڑ صاحب حیثیت بندغ آتیان وسیلہ مچ کرسا اُرا اُرا ٹی ضرورت مند آتا کمک ءِ کریر دا عمل بھاز است بڈی و سفت کڑزک۔او پارے کہ طبی کارندہ غاتا سیفٹی کن غٹ المی ازباب آتے زوت محکمہ جانجوڑی ءِ تننگرہ۔ کورونا دَین نا ناجوڑ آتا درمان کن جوان بست وبند کننگ انگ ءِ۔ بندغ آتے خُلنگ نا گرج اف‘ اگہ کس اٹ کورونا نا علامت مس تو دمدستی ڈاکٹر آتون رابطہ کے۔ رزاکا ناجوڑی ءِ ڈکنگ آن زہمی بندغ نا خاہوت وخاص وڑ اٹ بزرگ و چناتا زند خطرہ ٹی مننگ کیک۔