حساب تننگ نا وخت بسنے، جمہوری بیر ہلینہ، بلاول بھٹو

نصیر آباد (تلار حوالکار) چیئرمین پیپلز پارٹی بلاول بھٹوزرداری حکومت نا برخلاف جنگ انا پڑو کرسا پارینے کہ 27 فروری آ کراچی آن اسلام آباد کن پیش تمنہ۔ جمہوریت نا بیر دادے کہ سلیکٹڈ ءِ جمہوری وڑ اٹ اینک کین۔ دا ہیت آتا درشانی ءِ او نصیر آباد نا علاقہ تمبو ٹی قبائلی شخصیت بابا غلام رسول عمرانی نا پی پی پی ٹی ہننگ نا وخت آ اڈ ہلوک جلسہ غان تران کرسا کرے۔ جلسہ غان تران کرسا بلاول نا پاننگ ئس کہ گڑینگ انگ نا وخت بسنے، حساب تننگ نا وخت بسنے، عمران خان آن الس بیزار مسنے، و اوفک داسہ اوڑا پت کپننگ ءِ۔ داسہ پارلیمان نا پت داسہ بایدے چٹے۔ بلاول نا پاننگ ئس کہ دتک ءِ کلہو تننگ خوانہ کہ پیپلز پارٹی پڑ آ بننگ اٹی ءِ، کپتان اِرغ پچ و ہنکین پلنگ ءِ ۔ خان صاحب نما زرگزرانی حق، نما وونٹ، نما کننگ آ داڑیلی خلکنے۔ نن سگنگ کپنہ۔ نن جنگ انا پڑو کننگ اُن۔ چیئرمین پیپلز پارٹی نا پاننگ ئس کہ نن تینا حق آتے پلنگ چانہ۔ جمہوریت نا بیر دادے کہ سلیکڈٹ ءِ جمہوری وڑ اٹ قومی اسمبلی آن بے سہب کین۔ نن 27 فروری آ کراچی آن پیش تمنہ، اسلام آباد آ کانہ۔ بلوچستان نا الس نن تون کمک کیک۔ ویل آتا ایسر جمہوریت جہد اتون گنڈوک ءِ۔ نن سلہہ آخا وونٹ انا اکداری آ باور کینہ۔ او پارے کہ 1973ء نا آئین ریاست و الس نا نیام اٹ معاہدہ اسے۔ ہراتم آن سلیکٹڈ حکومت بسنے غریبی، بیروزگاری و کبینی ٹی ودکی بسنے۔ نم ننے اسہ وار خواہی اس ایتبو، اسہ وار ولدا پاکستان پیپلزپارٹی آ بھروسہ کبو۔ نن بنجا پرست اُن، نن دا پانہ کہ کل صوبہ غاتے حق رسینگے تو بنجا سوگو مریک۔ کل صوبہ غاک تینا وسیلہ غاتا مالک مریر گڑا بنجا سوگو مریک۔جلسہ غان پاکستان پیپلزپارٹی نا صوبائی صدر میرچنگیز جمالی، جنرل سیکرٹری روزی خان کاکڑ، مسکوہی وزیر اعلیٰ بلوچستان سردار ثنا اللہ زہری، جنرل (ریٹائرڈ) عبدالقادر بلوچ، سردارزادہ بابا غلام رسول عمرانی، سردار چنگیز ساسولی، میرمحمد صادق عمرانی،حاجی علی مدد جتک اسک ہم تران کرری۔دا وخت آ سوارہ اس ہم کننگا۔ چیئرمین بلاول بھٹو زرداری ءِ اولیکو جنگ عظیم اٹ کاریم اٹ بروک سیمی آٹومیٹک رائفل نا ٹیکی تننگا۔ سوارہ ٹی چنگیز جمالی، نواب ثنااللہ زہری، جنرل ریٹائرڈ عبدالقادر بلوچ، حاجی علی مدد جتک، صادق عمرانی، عمر گورگیج، میر بلال عمرانی ،میر اعجاز جاکھرانی، سینیٹر سیف اللہ مگسی، گل محمد جاکھرانی، محمود عالم جاموٹ، سردار چنگیز ساسولی، سردار فیصل جمالی، سربلند خان جوگیزئی، قیصر بلوچ، شاہ میر امتیاز، عمران بلوچ، نواز جتک، عمران جتک، پیر خالد سلطان باہو، میر عبدالنبی زہری، ریاض شاہوانی، اسلم ابڑو اسک ساڑی ئسرہ۔