امریکہ تون واپار و ہر بشخ اٹ تعلقداری تے ودفنگ خوانہ، اسحاق ڈار

اسلام آباد: بنجائی وزیرخزانہ سینیٹر محمد اسحاق ڈار تون پاکستان اٹی امریکہ نا سفیر ڈونلڈ بلوم اوڑدہی کرے۔ چارشنبے نادے آ وزارت خزانہ غان جاری بیان نا رداٹ اوڑدہی ٹی ہڑتوم آ ملک آتا نیام اٹ تین پہ تینی است خواہی نا امور و ہڑتوم آ کنڈآتا تعلقداری آ گپ وتران کننگا۔ اوڑدہی ٹی زرکاری، واپاری و ہڑتوم آ کنڈآتا ملک آتا نیام اٹ تعلقداری تے ودفنگ آ ہم گپ وتران کننگا۔ امریکی سفیر ڈونلڈ بلوم اقتصادی و واپاری پڑتیا امریکہ نا پاکستان تون سوگو تاریخی و پائیدار ہڑتوم آ کنڈآتا تعلقداری نا ستاءِ کرے۔ وزیرخزانہ سفیر ءِ آئی ایم ایف تون عملہ نا کہول آ معاہدہ غا سرسہبی اٹ سرمننگ نا بارواٹی ہم معلومدار کرے و زرگزران ءِ سوگوی اٹ شونداری نا کنڈا دننگ کن حکومت نا اقتصادی پالیسی و اولیت آتا بارواٹی سرجمی اٹ مون آ تخا۔ امریکی سفیر ملک اٹی زرگزرانی سوگوی اتنگ کن حکومت نا پالیسی و پروگرام تیا پت انا درشانی ءِ کرے۔ ہڑتوم آ فریق آک اسیجائی است خواہی نا بشخ و ہڑتوم آ ملک آتا نیام اٹ ساڑی ہڑتوم آ کنڈآتا تعلقداری تا پین مون آ دننگ آ ہم گپ وتران کریر۔ وزیرخزانہ سینیٹر اسحاق ڈار امریکہ نا مخ تفی و کمکاری نا ستاءِ کرسا حکومت نا امریکہ تون ہڑتوم آ کنڈآتا اقتصادی و واپاری تعلقداری تے پین سوگو کننگ نا عزم انا درشانی ءِ کرے۔

(اے پی پی)