دہشتگردی ءِ سفارتی پوائنٹ اسکورنگ کن کاریم اٹ اتنگپ، شہباز شریف

اسلام آباد :  وزیراعظم محمد شہباز شریف پارینے کہ ڈیہہ اٹی پائیدار امن شنگھائی کمکار تنظیم (ایس سی او) ناغٹ باسک ملک آتا زمواری ءِ، ریاستی دہشت گردی تون اوار ہروڑنا دہشت گردی تون پورو عزم اٹ جنگ تننگ نا گرج ءِ، ”کنیکٹیویٹی“ ءِ پوسکن جہانی زرگزران اٹ اہم ءُ اہمیت اس دوئی مسنے دانا مون آ دننگ نا کمک اٹ زرگزرانی سوگوی دوئی کننگ مریک، سفارتی پوائنٹ اسکورنگ کن دہشتگردی ءِ کاریم اٹا تنگپ، سی پیک زرگزرانی شونہالی، امن و سوگوی ٹی گیم چینجر جوڑ مریک، شون ہلوک ملک آتے کن المی ءِ کہ اوفک چاگڑدی بدلی تیان مروک آ نسخان تتون مون تننگ کن پدتموک ملک آتا کمک ءِ کیر، پاکستان برجاسال انا ایسر آ مواصلات نا بابت ایس سی او دیوان نا مہمانداری ءِ کیک۔ داخیال آتا درشانی ءِ او سے شنبے نادے آ شنگھائی کمکار تنظیم نا 23 می سروکی دیوان آن تران کرسا کرے۔ تنظیم نا آن لائن دیوان بھارت نا مہمانداری ٹی مس ہراٹی شنگھائی کمکار تنظیم نا باسک ملک آتا سروک آک ویڈیو لنک انا کمک اٹ بشخ ہلکر۔ وزیراعظم دیوان آن تران کرسا قزاخستان ءِ تنظیم نا رکنیت ملنگ آ مبارکبادی تس۔ اوایرانی صدر ابراہیمی رئیسی ءِ ہم تنظیم نا باسک جوڑ مننگ آ مبارکبادی پیش کرے و ایران نا شمولیت ءِ ستاکڑزوک گوندا۔ وزیراعظم بیلاروس ءِ تنظیم نا بروک آ دیوان اٹی پورو رکنیت تننگ نا فیصلہ نا ہم ستاء کرے۔ وزیراعظم پارے کہ ایس سی و دیوان ہندن ءُ وخت اسے ٹی مننگ ءِ ہراتم دنیا ءِ زرگزرانی و سلامتی نا چیلنج مون تروک ءِ۔ اوپارے کہ شنگھائی کمکار تنظیم امن، سوگوی، سلامتی و شونداری نا بابت تینا کڑد ءِ بایدے ودفے۔ اوپارے کہ کنکٹیویٹی پوسکن آ جہانی زرگزران اٹ اہم ءُ اہمیت اس اختیار کرینے، کنکٹیویٹی کن زرکاری کروئی مریک، ٹرانسپورٹ کوریڈورز نا تفنگ نا کمک اٹ زرگزرانی سوگوی دوئی کننگ مریک۔ اوسی پیک ءِ زرگزرانی شونہالی، امن و سوگوی کن گیم چینجر گوندسا پارے کہ دا بیلٹ اینڈ روڈ انا اہم ءُ ڈٹ اسے۔ اوپارے کہ پاکستان ءِ اسہ یکتا جغرافیائی حیثیت اس دوئی ءِ۔ اوپارے کہ سی پیک نا رداٹ خصوصی اقتصادی زون جوڑ کننگ انگ ءِ ہرا بندرگاہ تتون منسلک مریک۔ وزیراعظم پارے کہ پاکستان برجاسال انا ایسر آ مواصلات نا بابت ایس سی او دیوان نا مہمانداری ءِ کیک۔ وزیراعظم زور شاغا کہ شنگھائی کمکار تنظیم نا باسک ملک آتے دہشت گردی نا برخلاف پورو عزم اتون اواری اٹ جنگ تننگ نا گرج ءِ۔ اوپارے کہ دہشت گردی نا باندات آ ڈپلومیٹک پوائنٹ سکورنگ بایدے مف و ریاستی دہشت گردی تون اوار ہروڑنا دہشت گردی نا مذمت ءِ کننگے انتئے کہ اسہ دہشت گردی اسے نا ہچ ءُ سوب اس مننگ کپک۔ اوسیاسی ایجنڈا نارداٹ مذہبی اقلیت آتے شست کننگ نا ہم مذمت ءِ کرے۔ اوپاریکہ پرامن و سوگو اوغانستان ڈیہہ اٹی زرگزرانی سوگوی نا سوب جوڑ مریک و دا شنگھائی کمکار تنظیم نا مسخت آتا دوئی کننگ کن ہم المی ءِ۔ وزیراعظم پارے کہ ایس سی او اوغانستان رابطہ گروپ اہم کڑد اس ادا کننگ ءِ، جہانی ویل آتا ایسری کن جہانی یکجہتی نا گرج ءِ۔ اوچاگڑدی بدلی ءِ اہم ویل اس گوندسا پارے کہ جہانی برادری ءِ چاگڑدی بدلی نا اثرآتون مون تننگ کن اواری اٹ گام گیج کروئی مریک۔ اوپاریکہ پاکستان چاگڑدی بدلی آن ترند زہمی ملک آتیٹی اوار ءِ۔ پاکستان تدوک آ سال چاگڑدی بدلی نا بھسکار اثرآتون مون تس، نوکاپ آن سد آ بندغ زوال کریر وخت اس کہ پاکستانی زرگزران ءِ 30 ارب ڈالر آن زیات نا نسخان مس۔ وزیراعظم توانائی و غذائی گڑاتا نہاد آتیٹی ودکی ءِ جہانی ویل گوندسا پارے کہ نیزگاری نا چٹفنگ کن ہم جہانی برادری ءِ کمکاری ءِ ودفنگ نا گرج ءِ۔

(اے پی پی)