کورونا ویل ودی کرے: کبینی نا مون ءِ توننگ کن گام گیج کننگ انگ ءِ،حکومت

اسلام آباد: خزانہ سلاہکار شوکت ترین پارینے کہ کوروناء دین پاکستان آخا مچ آ دنیا نا زرگزران کن بے کچ بھلو چیلنج ودی کرینے، امریکہ تون اوار مچ آ دنیا نا حکومت آک کبینی کون آ ویل انا مون ءِ توننگ کن کوشست کننگ انگ ءِ۔ تحریک انصاف نا حکومت الس ءِ لس وڑ اٹ و غریب تپہ ءِ خاص وڑ اٹ جہانی زرگزران نا زہم آتیان بچنگ کن گام گیج کننگ انگ ءِ۔ سرجم حوال آتا رد اٹ گرج انا گڑا تا نہاد آتیٹی ودکی نا مون ءِ توننگ نا بابت چیف آرگنائزر پاکستان تحریک انصاف سینیٹر سیف اللہ خان نیازی و خزانہ سلاہکار شوکت ترین اہم ءُ اوڑدہی اس کرینے، پاکستان تحریک انصاف نا بنجائی سیکرٹری گڈ گورننس شاہد یوسف ہم اوڑدہی ٹی ساڑی ئسکہ۔ اوڑدہی نا وخت آ گرج انا گڑا خاص وڑ اٹ کنوئی گڑا تا نہاد آتیٹی سٹی ودکی نا توننگ کن اہم انگا باندات آتیا سرجم ہیت و گپ کننگا۔ کبینی نا مون ءِ توننگ نا بابت بنجائی حکومت نا خصوصی گام گیج آتیا ہم سرجم ہیت و گپ کننگا۔ چیف آرگنائزر سینیٹر سیف اللہ خان نیازی نا کنڈ آن کبینی نا توننگ کن خزانہ سلاہکار تون پورو کمک نا سلہ خلنگا۔ دا وخت آ خزانہ سلاکار پارے کہ وزیر اعظم احساس نا رد اٹ کروڑ آ اُرا تے مارکیٹ آن کم نہاد آ کنوئی گڑا فراوان کننگ نا ڈٹ سجفنگ نا بنا کننگانے۔ سینیٹر سیف اللہ خان نیازی پارے کہ پاکستان تحریک انصاف جماعت نا وڑ اٹ کبینی نا مون ءِ توننگ کن خزانہ سلاہکار و اوفتا ٹیم انا پورو کمک کن تیار ءِ۔ او پارے کہ تحریک انصاف نا بنجائی سیکرٹری گڈ گورننس شاہد یوسف نا سروکی ٹی مچ آ ملک اٹی شیفکو کہول آ گڈ گورننس نا ٹیم جوڑ کننگانے۔ او پارے کہ بود تخوک و المی آزموندہ کار کارندہ و غاتے دا ٹیم انا بشخ جوڑ کننگانے۔ او ہندی کہول آ سرکاری نہاد آتا خلاف ورزی نا توننگ و کبینی نا مون ءِ توننگ کن بھاز اہم ءِ۔ او پارے کہ کانود نا دنگ اٹ پک کروک وڑ و ڈَول انا رد اٹ خزانہ سلاہکار و اونا ٹیم اتون کمک کن سنبرینگوک اُن۔ خزانہ سلاہکار نا کنڈ آن کمک نا سلہ خلنگ آ چیف آرگنائزر پاکستان تحریک انصاف نا منت ءِ ہرفے۔

(آن لائن)