بلوچستان ءِ پُہہ مننگ کن اونا تاریخ، جغرافیہ، راجی پنجر‘ سیاسی ردوم و ساڑی حالیت آتے ہروئی تمک،وزیراعلیٰ بلوچستان میر سرفراز بگٹی

اسلام آباد، وزیراعلیٰ بلوچستان میر سرفراز بگٹی پارینے کہ بلوچستان ءِ پُہہ مننگ کن اونا تاریخ، جغرافیہ، راجی پنجر‘ سیاسی ردوم و ساڑی ڈغاری راستکی تے ہروئی تمک۔ بیرہ مخصوص واقعہ یا اسہ کنڈی بیانیہ نا بنداو آ صوبہ نا مستین و ساڑی حالیت آتے پُہہ مننگ مفک‘ بلوچستان نا ویل آتا مدامگی ایسری گچین گورننس، میرٹوکریسی نا شون تننگ‘ سیاسی بشخ ہلنگ، ورناتیکن وارخواہی تا ودی کننگ، زرگزرانی شون و ریاستی رٹ انا بھرمی نفاذ اٹ گنڈوک ءِ‘ دا خیال آتا درشانی ءِ او تدوک آ دے اسلام آباد پالیسی ریسرچ انسٹیٹیوٹ (IPRI) نا کنڈآن اڈ ہلوک دود اٹی ’خصوصی لیکچر‘ نا وخت آ کرے‘ ہراڑے اودے خاص انگا مہمان نا وڑ اٹ سلہ خلنگاسس‘ وزیراعلیٰ پارے کہ بلوچستان نا ڈیہہ ہزار آ سال تا متکن آ تہذیبی تاریخ تخک و مہرگڑھ اونا متکن آ تہذیبی اہمیت نا نمان ءُ شاہدی اسے۔ جتا دور تیٹی داڑے ہندی راج، قبائلی نظام، خانیت قلات، برطانوی دور و پد اٹ پاکستان نا سیاسی و انتظامی نظام تون اوار حکومتی و سیاسی پنجر جوڑ مرسا کرے‘ او پارے کہ بلوچستان نا تاریخ نا جتا دور آتے اوفتا مخصوص سیاسی، راجی و علاقائی حالیت آتا رد اٹ ہننگ نا گرج ہےءِ‘ تاریخی باندات آتے ٹی سلاہ تننگ نا اصل مآخذ و پک دستاویزی ریکارڈ و پک حوالہ غاتیان کاریم ہلنگے‘ خاص وڑ اٹ بلوچستان نا پاکستان تون اوار مننگ تون اہم تاریخی باندات آتے جذباتی یا اسہ کنڈی بیانیہ نا جاگہ غا تاریخی شاہدی تا رد اٹ پُہہ مننگ المی ءِ‘‘ میر سرفراز بگٹی پارے کہ صوبہ نا ساڑی حالیت آتا جاچ ءِ ہلسا پسماندگی ءِ اسٹ انگا سوب گوندنگ راست اف‘ پاکستان تون اوار دنیا نا ہر علاقہ ٹی شونداری ٹی کمی بیشی مرے ولے اسہ علاقہ سے نا ہم محرومی یا پسماندگی نا پن آ بیدادی و بے گناہ شاری تا کشت و خون نا موکل تننگ مفک۔