آئی ایم ایف معاہدہ، ڈالر و خیسن اڑزان، اسٹاک ایکسچینج اٹ ترندی

اسلام آباد : آئی ایم ایف تون معاہدہ نا زہم تا بنا امریکی ڈالر ناقدر ہم کم مسنے۔ اوپن مارکیٹ اٹ تدوک آ دے بھلا عئید انا چھٹی تیان پد کاروبار نا بنا ٹی ڈالر 5 روپئی اڑزان مس‘ اوپن مارکیٹ اٹ ڈالر 5 روپئی اڑزان مننگ آن پد 285 روپئی نا مسنے‘ گدرینگوک آ کاروباری ہفتہ نا اخیر اٹ اوپن مارکیٹ اٹ ڈالر 290 روپئی نا ئس‘ داٹون اوار ملک اٹ خیسن نا نہاد ہم شیف بسنے۔ آل پاکستان جیمز اینڈ جیولرز ایسوسی ایشن نارد اٹ خسین نا اسہ تولہ نا نہاد 8 ہزار 800 روپئی کم مرسا 2 لکھ 7 ہزار 200 روپئی مس۔10 گرام خسن 7544 روپئی کم مرسا اسہ لکھ 77 ہزار 641 روپئی آ مس‘ وخت اس کہ جہانی صرافہ ٹی خیسن نا نہاد 6 ڈالر ودنگ آن پد 1912 ڈالر فی اونس ءِ‘ ہندا وڑ پاکستان اسٹاک ایکس چینج اٹ اولیکو وار کاروبار نا بنا ٹی تاریخ مس‘ آئی ایم ایف تون 3 ارب ڈالر نا ڈیل آن پد کاروبارنا اولیکو دے آ بھاز تیزی خننگا‘ پاکستان اسٹاک ایکسچینج نا تاریخ اٹ اولیکو وار کاروبار نا 2230 پوائنٹ ودکی تون بنا مس۔ کاروبار نا بنا ٹی ہنڈریڈ انڈیکس یکدم 5.3 درسَد بڑزا ہنا ہراکان گڈ کاروبار ءِ اسہ گھنٹہ سیکن توننگا۔کاروبار نابنا ٹی ہنڈریڈ انڈیکس 43 ہزار نا کہول آن ایپار مس و انڈیکس 2068 پوائنٹ ودنگ آن 43521 اسکان سر مس‘ اسہ گھنٹہ غان گڈ پاکستان اسٹاک مارکیٹ اٹ کاروبار نا دوارہ بنا مثبت وڑ اٹ مس و ہنڈریڈ انڈیکس 5.62 درسَد آن ودسا 43783 آ ہنا۔ جہانی مالیاتی ادارہ (آئی ایم ایف) و پاکستان نا نیام اٹ 3 ارب ڈالر نا دا اسٹینڈ بائی ارینجمنٹ نا معاہدہ اسے‘ اعلامیہ نا رد اٹ آئی ایم ایف ایگزیکٹو بورڈ اسٹاف لیول معاہدہ نا منظوری ءِ ایتک و ایگزیکٹو بورڈ نا دیوان جولائی نا نیام اٹ مریک‘اعلامیہ ٹی پاننگا کہ معاہدہ پاکستان نا پیشن ناوام تے تننگ نا دباؤ ءِ کم کیک و معاہدہ غان راجی بشخ اکن فنڈ انا فراوانی گچین مریک وخت اس کہ پاکستان اٹ خراج نا کٹیا ءِ ودفک۔ بنجائی وزیر خزانہ سینیٹر محمد اسحاق ڈار پارینے کہ اوپن مارکیٹ اٹی روپئی نا مقابلہ ٹی ڈالر نا نہاد 270 آن 272 روپئی اسکان بسنے۔ دوشنبے نادے آ سینیٹر محمد اسحاق ڈار تینا ٹویٹ ٹی پارے کہ ڈالر نا مقابلہ ٹی روپئی نا قدر اٹی گچینی بننگ ءِ۔ اوقوم ءِ مبارکبادی ترسا پارے کہ پاکستان اسٹاک ایکسچینج اٹی کاروبار نا اولیکو دے 2334 پوائنٹ آتا ودکی مس، مئی نا مقابلہ ٹی جون اٹی افراط زر انا کچ 29.4 درسد اسکان بس۔ اوپارے کہ دا کچ مئی 2023 اٹی 38 درسد ریکارڈ کننگاسس۔ بنجائی وزیر خزانہ پارے ک حکومت زرگزران نا گچینی کن اولیتی بنداو تیا گام گیج کننگ اٹی ءِ ہرافتا بھرم نا بننگ بناکرینے۔ وزیرخزانہ سینیٹر محمد اسحاق ڈار تون پاکستان اٹی چین نا سفارت خانہ نا ناظم الامور پینگ چنکسو فنانس ڈویژن اٹی اوڑدہی کرے۔ دوشنبے نادے آ وزارت خزانہ غان جاری بیان نا رداٹ اوڑدہی ٹی پاکستان و چین نا نیام اٹ ہڑتوم آ کنڈآتا تعلقداری آ سرجمی اٹ گپ وتران کننگا۔ داوخت آ وزیرخزانہ ناظم الامور ءِ آئی ایم ایف تون 9 ممی جاچ آ مروک آ پیش رفت نا بارواٹی پارے۔ پاکستان اسٹاف لیول نا معاہدہ غا سرسہبی اٹ رسینگانے۔ اوپارے کہ حکومت زرگزران ءِ سوگو کننگ کن اولیتی بنداو تیا گام گیج کننگ ءِ۔ اوپاکستان کن چین نا مخ تفی نا ستاءِ کرے و خاص وڑاٹ تدوک آ منہ تُو اٹی پاکستان تون چینی مالیاتی ادارہ غاتا کمکاری آ ہم منت واری ءِ ہرفے۔ ناظم الامور پینگ چنکسو ہڑتوم آ ملک آتا نیام اٹ دوستانہ تعلقداری تے تالان کرے۔ اومشکل زرگزرانی حالیت آتیان پد ہم ملک اٹی زرگزرانی سوگوی اتنگ کن حکومت پاکستان نا کوشست آتا ستا ءِ کرے۔ اووزیرخزانہ ءِ پین باور کرفے کہ چینی حکومت پاکستان نا مخ تفی ءِ برجاتخک۔ ہڑتوم آ فریق آک اقتصادی، واپاری و مالیاتی بشخ آتیٹی ہڑتوم آ کنڈآتا تعلقداری تے ودفنگ کن دوئی وڑوڈول آتیا ہم گپ وتران کریر۔ وزیرخزانہ اسحاق ڈار پاکستان تون کمکاری آ چینی سرکڑدہ نا منت واری ءِ ہرفے۔

(آن لائن/اے پی پی)