کوئٹہ شار انا آبادی ءِ مون آ تخسا پوسکن ءُ ڈٹ مونی اتنگے، قدوس بزنجو

کوئٹہ:  وزیراعلیٰ بلوچستان و چیئرمین کوئٹہ ڈویلپمنٹ اتھارٹی میر عبدالقدوس بزنجو ناکماشی ٹی اڈ ہلوک کوئٹہ ڈویلپمنٹ اتھارٹی نا گورننگ باڈی نا دیوان اٹ اہم انگا فیصلہ غاتا منظوری ءِ تننگا‘ دیوان اٹ گورننگ باڈی نا باسک صوبائی اسمبلی نا باسک اختر حسین لانگو، نصراللہ خان، شاہینہ مہترزئی، قادر نائل، کمشنر کوئٹہ ڈویژن سہیل الرحمان، ڈائریکٹر جنرل کیو ڈی اے مزمل حسین ہالیپوتو اسٹیشن کمانڈر کوئٹہ کینٹ ڈپٹی کمشنر کوئٹہ شہک بلوچ و ایڈمنسٹریٹر کوئٹہ جبار بلوچ تون اوار ایلو تعلقدار کمامدار آک بشخ ہلکر‘ دیوان ءِ ڈی جی کیو ڈی اے نے ایجنڈا پوائنٹ آتیا بریفنگ تس‘ دیوان اٹ کوئٹہ سبی روڈ آ سلاہی کیو ڈی اے انکلیو ہاؤسنگ ناسلاہی ڈٹ آتا اولسرجاچ ہلوک پی سی ون نا منظوری تننگا‘دا ڈٹ 100 ایکڑ آ تالان 750 ہنکینی پلاٹ سیوک سینٹر اسکول پارک ہسپتال ایلو پوسکن آ آسراتی تیان شپ مریک‘ دیوان اٹ سرکی روڈ آ ساڑی مست انا سوزی منڈی ٹی واپاری بنداو آ 42 دکان جوڑ کننگ نا ڈٹ انا منظوری ہم تننگا‘دیوان ءِ پاننگا کہ ہندا دکان تا مالک آک دکان تا الاٹمنٹ ناپیسہ غاتے تسنو‘ دیوان اٹ کیو ڈی اے نا ڈغار آ نجی اسکول نا لیز انا ودفنگ ءِ ہندی نجی اسکول اٹ غریب طالب علم آتیکن اسکالر شپ و حقدار طالب علم آتے مفت داخلہ تننگ نا شڑت اتون گنڈنگ نا اصولی فیصلہ غا امنا کننگا‘ دیوان اٹ ہزار گنجی ٹی جوڑ 478 دکان تا سلوک پیسہ غاتے تننگ کن مالک آتے نوٹس جاری کننگ نافیصلہ کننگا‘ دیوان اٹ کوئٹہ ڈویلپمنٹ اتھارٹی نا رہائشی و کمرشل پلاٹ آتا ٹرانسفر فیس این او سی وایلو تعلقدار امور تا بابت خراج ءِ ودفنگ نا منظوری ہم تننگا۔ دیوان اٹ زرغون ہاؤسنگ اسکیم کوئٹہ نا خورک انگا کمرشل پلاٹ آتا ریٹ و رینٹ اسیسمنٹ کمیٹی نا سلاہ تروک بنداوی ریٹ پرائس نا منظوری ہم تننگا۔ دیوان آن تران کرسا وزیراعلیٰ بلوچستان میر عبدالقدوس بزنجو پارے کہ نن کوئٹہ نا شاری تے زیات آن زیات آسراتی فراوان کننگ خوانہ‘ کوئٹہ ڈویلپمنٹ اتھارٹی کوئٹہ شارا نا رہینگ نا ودوک آویل آتے ایسر کننگ کن پوسکن ءُ سلاہ ایتے و کیو ڈی اے نا وڑ اٹ جوڑ ملک انا ایلو بھلا شارتا ادارہ غاتیان ہم سلاہ ہلنگے و ہندن ءُ ڈٹ مونی اتنگے ہراکہ پوسکن آ وخت اتون ہمگرنچ مریر وہاؤسنگ اسکیم جوڑ کننگ نا وخت آ گیس و بجلی نافراوانی ءِ پک کننگے تاکہ رہائشی اسکیم تے ٹی کل بنداوی آسراتیک مریر انتئے کہ نن کوئٹہ نا شاری تے زیات آن زیات آسراتی تا فراوانی ءِ پک کننگ خوانہ۔

(خ ن)