اپوزیشن سیوت نا قومی سلامتی کمیٹی نا ’اِن کیمرہ‘ بریفنگ آن بائیکاٹ نا فیصلہ

اسلام آباد: پارلیمنٹ اٹ اپوزیشن سیوت حکومت ناکنڈآن بٹنگوک پارلیمانی قومی سلامتی کمیٹی نا ’اِن کیمرہ‘ بریفنگ نا بائیکاٹ نافیصلہ کرینے‘ اپوزیشن سیوت ناکنڈآن جاری کروک اسیجائی اعلامیہ ٹی پاننگانے کہ 6 دسمبر 2021 آ حکومت ناکنڈآن پارلیمانی قومی سلامتی کمیٹی ٹی ’اِن کیمرہ‘ بریفنگ تننگ نا بابت آگاہ کننگاسس و پاننگاسس کہ قومی سلامتی نا سلاہکار ڈاکٹر معید یوسف ’اِن۔کیمرہ‘ دیوان ءِ بریفنگ ایتک‘ ہراڑا حزب اختلاف اٹ اوار جماعت آک آئین، کانود، قومی سلامتی، السی اہمیت نا کل امور تیا مدام بھاز ذمہ داری اٹ و سنجیدہ قومی وڑانا عمل نا درشانی کرینے‘ ہندا سوب ءِ کہ قائد ایوان نا ساڑی مفننگ و اہم انگا قومی والسی باندات آتیان بے تعلقی آ پد ہم اپوزیشن جماعت آک قومی سلامتی، اہم انگا قومی باندات آتیا بٹنگوک بریفنگ ودیوان تے ٹی نئے بیرہ بشخ ہلکر بلکہ اپوزیشن نا سرکڑدہ و پارلیمانی لیڈر آک تینا سلاہ تے ہم تسر‘ اعلامیہ ٹی پاننگانے کہ اپوزیشن سیوت پارلیمنٹ نا اسیجائی دیوان اٹ اہم انگا کانود مسودہ (بِلز) ءِ بلڈوز کننگ نا حکومتی رویہ و اہم انگا آئینی، کانودی‘ قومی و سلامتی نا بابت امور تیا پد ریسہ آمرانہ وفسطائی وڑانا سوب آن فیصلہ کرینے کہ دا ’اِن کیمرہ‘ بریفنگ نا بائیکاٹ کننگک‘ اپوزیشن سیوت اٹ کل ہمو جماعت آک ءُ ہرافک بھاز ’بالغ نظر‘، آئین، ملک و الس تون گنڈوک ویل آتیا بھاز آزموندہ و سنجیدگی اٹ سجفرہ ہرا ساڑی جھیڑہ ئی دور اٹ ہم پاکستان و الس نا فائدہ غاتے اولیت ترسا تینا کڑدار ءِ ہر وڑ انا سیاسی فروعی فائدہ و خڑکی تے اسہ کنڈ تخسا ادا کرینے‘ ولے دا ہیت است ہسونی ناسوب ءِ کہ حکومت پارلیمان ءِ ربڑ اسٹیمپ نا وڑ اٹ کاریم اٹ اتنگ نا وڑوڈول ءِ تینائی کرینے۔ اعلامیہ نا رد اٹ پارلیمان اٹ اہم انگا داخلی وخارجی، قومی و السی امورتے اسُل اتپننگ انگ ءِ و ایوان اٹ اوفتیا شرہ ہم کننگپک ہراکہ آئین، پارلیمانی خواست و جمہوری ضابطہ غاتا بابت المی ءِ‘ بلکہ پارلیمان ءِ پدریسہ گوجالسا ’اِن کیمرہ‘ بریفنگ اٹ باندات آتے چلیفنگ انگ ءِ‘ اصل اٹ حکومت عملا پارلیمنٹ نا بائیکاٹ ءِ کرینے ہرا جمہوریت اٹ بنداوی آئینی، کانودی و السی فورم ءِ۔ اپوزیشن پارینے کہ سلیکٹڈ وزیراعظم مقبوضہ جموں وکشمیر تون اوار اہم انگا قومی باندات آتیا بٹنگوک دیوان تے ٹی بشخ ہلپک انتئے او سلابت نا جمہوری روح، فیصلہ سازی اٹ جتا جتا سلاہ تا اہمیت آن نئے بیرہ نابلد ءِ بلکہ قوم انا جم دانش ءِ ملک ومخلوق نا فائدہ کن کاریم اٹ اتنگ نا ہنر و لائخی تیان ہم محروم ءِ‘ دا حالیت آتے ٹی دا وڑ انا ’اِن۔کیمرہ‘ بریفنگ غاک بیرہ پوسکن ءُ حکومتی راگ اسے نا کسر ءِ ساف کیرہ ہرانا ملک و مخلوق ءِ مون تروک سنجیدہ و بھاز نازک باندات آتا پوروی یا اوفتے ایسر کننگ کن مفسہ۔ اپوزیشن سیوت پارینے کہ وزیراعظم نا قومی سلامتی نا سلاہکار فیصلہ کننگ و پد اٹ ڈکوک راستکی تیا تعلقدار معلومداری و واک آن محروم و بیرہ نمائشی کڑدار اسے‘ ہرانا حقی ویل وآخبتی نا خاکہ تون ہچ تعلقداری اف‘ دا کل سوب آتیان اپوزیشن سیوت بریفنگ نا بائیکاٹ نافیصلہ کرینے۔

(آن لائن)