شیسالار امین آباد روڈ اکن فنڈ ریلیز آن پد ہم کاریم بنا متو، حاجی علی بیگ

چاغی نا قبائلی و سیاسی راہشون چیئرمین یو سی شیسالار حاجی علی بیگ محمد حسنی تینا اسہ بیان اسے ٹی پارینے کہ شیسالار ٹو امین آباد روڈ انا فنڈ ریلیز مننگ آن پد ہم کاریم بنا متنے۔ کروڑ آ روپئی تا زیان مننگ نا خلیس ارے‘ ہرانا سوب آن شیسالار و امین آباد نا الس ءِ بھاز خواری مون تروئی تمنگ اٹی ءِ۔ شیسالار ٹو امین آباد روڈ آ اولیکو ریسہ ٹی ٹھیکیدار مِش شاغسا کاریم ءِ نیمہ غا الانے ہرانا سوب آن الس ذہنی فریشان ءِ۔ مِش و لوڑ ودنز آن شیسالار و امین آباد نا الس ویل آتا گواچی ءِ۔ او پارے کہ شیسالار ٹو امین آباد روڈ انا فنڈ ریلیز مننگ نا پد ہم پورو مفننگ ناسوب آن علاقہ نا مخلوق بھاز فریشان ءِ۔ او وزیراعلیٰ بلوچستان میر سرفراز بگٹی، ایم پی اے چاغی حاجی صادق خان سنجرانی، چیف سیکرٹری بلوچستان، کمشنر رخشان ڈویژن و ڈی سی چاغی جہانزیب نور شاہوانی آن خواست کرینے کہ شیسالار ٹو امین آباد روڈ نا پورو مفننگ نا نوٹس ءِ ہلسا تعلقدار زموار آتا برخلاف کارروائی کننگے۔ چاغی (نامہ نگار)