بلوچستان نا سیاست نا تمبہ سردار عطاء اللہ خان مینگل دنیا ءِ اِلا

0

Get real time updates directly on you device, subscribe now.

پنی آ بلوچ قوم پرست راہشون بلوچستان نیشنل پارٹی نا سرپرست اعلیٰ، مسکوہی وزیراعلیٰ بلوچستان سردار عطاء اللہ خان مینگل کراچی نا پرائیویٹ ہسپتال اسے ٹی 92 سال نا وئی اٹ دنیا ءِ اِلانے۔

سردار عطا اللہ خان مینگل 1929ء اٹ وڈھ اٹی سردار رسول بخش مینگل نا اُراٹی ودی مس۔

بزرگ بلوچ قوم پرست راہشون سردار عطا اللہ خان مینگل ملکی بلکہ جہانی کہول انا سیاست دان اس ئسکہ۔

او مدام مظلوم قوم آتا حق اکن جہد کرے، و دا جہد ءِ او مچ زند برجا تخا۔

یکم مئی 1972ء آن 13 فروری 1973ء اسکان بلوچستان نا اولیکو وزیر اعلی مس۔

نہہ تُو نا گونڈ انگا وخت اٹی بلوچستان اٹی انقلابی ءُ بدلی ایس۔

بلوچستان یونیورسٹی نا بنداو، انجینئرنگ یونیورسٹی خضدار نا بنداو، و بلوچستان بورڈ آف انٹرمیڈیٹ اینڈ سیکنڈری ایجوکیشن نا بنداو ءِ او تخو۔ داکان مست بلوچستان بورڈ نا امتحان تننگ کن بلوچستان نا ورنا تے ملتان آ ہنوئی تماکہ۔

1973ء اٹی ہمو وخت انا وزیر اعظم ذوالفقار علی بھٹو بلوچستان اٹی گورنر راج خلسا بلوچستان اٹی سردار عطاء اللہ خان مینگل نا حکومت ءِ چٹفے۔

بلوچستان اٹی فوجی آپریشن کرے، بلوچستان اٹی فوجی آپریشن نا برخلاف سردار عطاء اللہ مینگل مزاحمت کرے، ہندا مزاحمت نا سوب آن اودے کیہی سال جیل کننگا۔

کیہی سال اسکان او جیل اٹ مس، ولے اینو پہ دے اسکان او تینا موقف آ سلوک ئسکہ۔

اوکان پد او کیہی سال آتسکان لندن اٹی جلاوطنی نا زندتیر کرے۔ 1990ء نا دہائی ٹی جلاوطنی ءِ چٹفسا پدی بس۔

جلاوطنی آن پد بلوچستان و ملکی کہول انا سیاست اٹ فعال ءُ کڑد اس ادا کرے۔

6 دسمبر 1996ء نا دے بلوچستان نا کل قوم پرست جماعت آتیا تالان بلوچستان نیشنل پارٹی نا بنداوءِ تخا۔

1997ء نا گچین کاری تیٹی بلوچستان نیشنل پارٹی بلوچستان اٹی گیشتری کہول آ سرسہبی دوئی کرے۔

22 فروری 1997ء نا دے بلوچستان نیشنل پارٹی نا راہشون سردار اختر جان مینگل وزیراعلیٰ بلوچستان گچین مس۔

سردار اختر جان مینگل 19 تُو اسکان بلوچستان نا وزیراعلیٰ ئس، اخیر بنجائی حکومت تون اختلاف آتیان پد جولائی 1998ء نا دے سردار اختر جان مینگل بلوچستان حکومت آن استیفہ تس۔

بی این پی نا قومی کونسل سیشن اٹی اختلاف آتا سوب آن بلوچستان نیشنل پارٹی اِرا ونڈ مس، تو متحدہ بی این پی نا گیشتری نا سلاہ اٹ صدر سردار عطاء اللہ خان مینگل گچین مس، وخت اس کہ میر مہیم خان بلوچ ایلو پڑک انا کماشی ءِ کرے۔

1998ء و 99 نا بنا ٹی پاکستان نا کل محکمہ غاتیٹی مظلوم قوم آتا حق آتا جہد اکن پونم نا پلیٹ فارم آن تحریک نا بناءِ کرے۔

پونم نا پلیٹ فارم آ پاکستان نا بھلا پنی آ کل سیاستدان تے مچ کرسا مظلوم قوم بلوچ، سندھی، پنجابی سرائیکی و پشتون تا غصب مروک حقوق آتے کن جہد انا بناءِ کرے۔

پونم نا تحریک اٹی بلوچستان اٹی جلسہ غاتا چرجوئی بنا کرے۔ 30 ستمبر 1998ء نا دے بابائے بلوچستان بزنجو اسٹیڈیم خضدار اٹی اسہ بھاز بھلو جلسہ اس مس۔

جلسہ غان ملکی کہول انا کل لیڈر آک تران کریر۔

وخت اس کہ ایلو ریسہ ٹی جلسہ نا بنا سندھ آن بنا مروئی ئس، ولے جنرل پرویز مشرف 12 اکتوبر 1999ء نا دے ملک اٹی مارشل لا خلسا ملک اٹی کل سیاسی سرجز آتیا رکھ خلک۔

سردار عطااللہ مینگل پونم نا کماشی ٹی گڈیکو جلسہ 17 جون 2006ء نا دے کوئٹہ ٹی میزان چوک آ مس۔ او بلوچ ورنا تے کن قومی حق آتا دوئی کننگ کن اسہ خاص ءُ کلہو اس تس۔

اوکان پد عملی سیاست اٹی جان دراخی و وئی انا سوب آن کم سرجز نشان تس۔

سردار عطااللہ مینگل نا بلوچستان و ملکی کہول آ سیاسی خذمت آک کس آن ڈکوک افس۔

سردار عطااللہ مینگل نا میت ءِ کراچی آن وڈھ آ اتنگک۔ و

پگہ بیگہ تون 4 بجہ غا وڈھ اٹی اونا نماز جنازہ مریک۔

و اونا وصیت نا رد اٹ وڈھ شار آن دے ٹِکی کنڈ آ شہداء قبرستان اٹ اودے جہہ و جاگہ کننگک۔

Get real time updates directly on you device, subscribe now.

Leave A Reply

Your email address will not be published.