اسلام آباد ہائیکورٹ نا نوازشریف ءِ سرنڈر کننگ نا پرمان

اسلام آباد ہائیکورٹ مسکوہی وزیراعظم نوازشریف ءِ سرنڈر کننگ نا پرمان کرینے۔

ایون فیلڈ ریفرنس اٹی سزا تا برخلاف نواز شریف، مریم نواز و کیپٹن (ر) صفدر اپیل دائر کریسر۔ جسٹس عامر فاروق و جسٹس محسن اخترکیانی آ تالان بینچ سماعت ءِ تے کرے وخت اس کہ نواز شریف نا وکیل خواجہ حارث دلیل تس۔

خواجہ حارث تینا دلیل آتیٹی پارے کہ ایون فیلڈریفرنس اٹی نوازشریف نا سزا معطلی آن پد ضمانت منظور مس، و العزیزیہ ریفرنس اٹی نواز شریف ءِ شڑت آتیا ضمانت رسینگا، نوازشریف نا ساڑی اسٹیٹس دادے کہ او دا وخت آ ضمانت آ اف۔ دا لیگل پوزیشن اسے کہ او ضمانت آ اف و درمان کن پیشن ملک آ ہنانے۔

دا وخت آ دلیل و شرہ غاتیان پد جسٹس عامر فاروق ریمارکس تس کہ نن اسہ تاریخ اس ایتنہ گڑا ہمو وخت نواز شریف سرنڈر کے تو نن داسکان نواز شریف ءِ نروک ڈیکلیئر کپننگ اُن۔ نن نواز شریف ئِ سرنڈر کننگ نا اسہ پین وارخواہی اس تننگ اٹی اُن۔ 

گڈ سر اٹ عدالت نوازشریف ءِسرنڈر کننگ نا پرمان کرے و مسکوہی وزیراعظم نا جانجوڑی نا بابت رپورٹ ءِ ہم بٹنگا