ڈی سی جعفرآباد خالد خان نا کماشی ٹی دیوان‘ ٹریفک نا روانی و بھرمی رابطہ غاتے پک کننگ نا پارت

نصیرآباد، ڈپٹی کمشنر جعفرآباد خالد خان نا کماشی ٹی ڈسٹرکٹ انٹیلیجنس کوآرڈینیشن کمیٹی نا اسہ اہم ءُ دیوان اس اڈ ہلک، ہراٹی ایڈیشنل ڈپٹی کمشنر جعفرآباد حضور بخش بگٹی تون اوار کانود نافذ کروک ادارہ غاتا افسر، محکمہ جانجوڑی و ایلو محکمہ غاتا افسر و نمائندہ غاک بشخ ہلکر۔ دیوان اٹی حضرت امام حسینؓ نا چہلم نا وخت آ امن و ایمنی نا جم حالیت، سیکورٹی پلان و ایلو بست وبند آتا جم جاچ ءِ ہلنگا۔ ڈپٹی کمشنر خالد خان تعلقدار ادارہ غاتے پارت کرے کہ چہلم نا وخت آ ٓ جلوس و مجالس آتے فول پروف سیکورٹی نا فراوانی ءِ پک کننگے، حساس ہند آتیا بھرمی چاروکی، ہنوک بروک کسر تیا سخت انگا چیکنگ، ٹریفک نا جوان روانی و کل تعلقدار محکمہ غاتا نیام اٹی بھرمی رابطہ ءِ برجا تخنگے تانکہ عزاداران آتے اسہ پرامن و رکھوک ءُ چاگڑد اس فراوان کننگ مرے۔ او پارے کہ الس نا جان و مال انا رکھ ریاست نا اولیکو زمواری ءِ و دا بابت ہچ ءُ ڈیوالئی اس سگنگ مفک۔