ملک انا زرگزران 4 درسد نا کچ آن ودنگ ءِ، چوہدری فواد حسین

اسلام آباد (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان نا زرگزران 4 درسد نا کچ آن ودنگ ءِ، پاکستان کورونا نا برخلاف گچین گام گیج آتے اٹ سرسہبی دوئی کرے، ملک اٹی کورونا نا کچ 4 درسد آن کم ءِ، پاکستان اٹی سیل و سوات نا مون آ دننگ نا بھلو وارخواہی اس ارے۔ داہیت ءِ او چارشنبے نادے آ داڑے اقتصادی کمکار تنظیم نا پارلیمانی اسمبلی کانفرنس آن تران کرسا پارے۔ بنجائی وزیر حوالکاری چوہدری فواد حسین پارے کہ پاکستان اسہ پرامن و زیباءُ ملک اسے، وزیراعظم نا سیل و سوات آ چکار ءِ، دا بشخ ننا زرگزران کن گیم چینجر اس جوڑ مننگ کیک، سوئٹزر لینڈ ننا قطبی علاقہ غاتا نیمہ بشخ مریک ولے نن سوئٹزرلینڈ ءِ اہمیت ایتنہ۔ اوپارے کہ نن ترکی آن سیل و سوات نا بشخ انا بابت بایدے ہیل کین۔ اوپارے کہ مچ آ دنیاٹی ننا سفارت خانہ غاک داچرجوئی ٹی مخلوق نا راہشونی ءِ کیر۔ اوپارے کہ ننے ویزا شڑت ءِ آسان کروئی مریک، ویزا و سیکورٹی نا حالیت آتے گچین کروئی مریک و پاکستان نا رکھ ملک مننگ نا احساس ءِ تالان کروئی مریک۔ بنجائی وزیر حوالکاری پارے کہ کے ٹو نا مش آن کراچی نا سمندرا سکان موسم نا بدلی نا درور دنیا ٹی اسہ جاگہ اس ہم ملپک، پاکستان اٹی ہروڑنا سیل و سواتی ہند ارے، ننے سیل و سوات نا بشخ انا اڑاند آتے چٹفوئی مریک۔ بنجائی وزیر حوالکاری پارے کہ خیبرپختونخوا و اونا حلقہ جہلم اٹی بے شمار سیل و سواتی ہند ارے، ٹلہ جوگیاں آن یوگانا شروعات مس، باباگرونانک و سکندر اعظم نا گذرگاہ ننا علاقہ مسنے۔ داڈیہہ نا تاریخ نا کساس ءِ داجاگہ نا متکن انگا تہذیب آن خلنگ مریک۔ اوپارے کہ پاکستان ہراوڑاٹ کورونا دین انا بابت گام گیج کرے، اوڑآ گمر ءِ۔ ڈیہہ نا ایلو ملک آک و بھارت نا مقابلہ ٹی پاکستان اٹی کورونا نا حالیت آک بھاز جوان ءُ۔ اینو پاکستان اٹی کورونا نا کچ 4 درسد ءِ ہراحکومت پاکستان و پاکستان نا الس کن اسہ بھلو سرسہبی اسے۔ اوپارے کہ غٹ مشکل آتیان پد ہم پاکستانی زرگزران 4 درسد نا کچ آن ودنگ ءِ، کورونا دین اٹی نن تینا نیزگار الس ءِ ہم دین انا اثرآتیان رکھ تخان۔ اوپارے کہ نن احساس پروگرام نا کمک اٹ نیزگار بندغ آتا رکھ ءِ پک کرین، ڈاکٹر ثانیہ نشتر مبارکباد نا حقدار ءِ۔