الیکشن بایدے مرے، حالیت آک وڑ اٹ افس، وزیر اعظم

لاہور: وزیراعظم شہباز شریف پارینے کہ پنجاب و کے پی نا گچین کاری تے اکتوبر آن مست کرفنگ مشکل ءِ‘ گچین کاریک بایدے مریر ولے ساڑی حالیت آتے ٹی او مننگ کپسہ‘ حوال نا رد اٹ وزیراعظم شہباز شریف نا کماشی ٹی یک شنبے نا دے اونا ہنکین ماڈل ٹاؤن اٹ مسلم لیگ (ن) نا اہم ءُ دیوان اس اڈ ہلک‘ دیوان اٹ سپریم کورٹ اٹ برجا مقدمہ و ساڑی ملکی سیاسی و آئینی حالیت آتیا سلابت کنگ‘ دیوان اٹ بنجائی وزیر کانود اعظم نذیر تارڑ، وزیراعظم نا خصوصی کمکار ملک احمد خان، ایاز صادق، عطاء اللہ تارڑ و احد چیمہ تون اوار کانودی چاہندار آک ساڑی ئسر‘ شریدار آک سپریم کورٹ اٹ مروک گچین کاری کیس انا سماعت نابارو اٹ آئینی وکانودی پالو تیا سجفیر۔ وزیراعظم شہباز شریف ءِ پنجاب و خیبرپختونخوا ٹی گچین کاری کیس انا کانودی و آئینی پالو تیان آگاہ کننگا‘ داڑتون اوار زرگزرانی و امن وایمنی نا حالیت آتیا ہم بریفنگ تننگا‘ وزیر کانود اعظم نذیر تارڑ سپریم کورٹ نا سماعت نا بابت شریدار آتے بریفنگ تس۔ حوالی نا رد اٹ شہباز شریف نا کماشی ٹی اڈ ہلوک دیوان اٹ فل بینچ اناخواست انا مسترد مننگ آ ریویو ٹی ہننگ نابابت کانودی پالو تیا سلاہ سوج کننگا‘ دیوان اٹ شریدار آک جج آتا اختلافی نوٹ انابابت پاریر کہ نن سپریم کورٹ ءِ شرف ایتنہ ولے اختلافی نوٹ آن ابہام ودی مس۔ داوخت آ وزیراعظم شہباز شریف پارے کہ پنجاب و کے پی گچین کاری تے اکتوبر آن مست کرفنگ مشکل ءِ‘ الیکشن بایدے مرے ولے حالیت آک دا وڑ افس‘ نن ملکی زرگزرانی ءِ گچین کننگ کن دے ونن کوشست کننگ اٹی ان ملک اٹ زرگزرانی و امن وایمنی نا حالیت آک داوڑ افس کہ دمدستی گچین کاری کرفنگ مرے۔ وزیراعظم مستی پارے کہ نن کبینی نا چر انا مون ءِ زوت تورنہ‘ نن تعمیری سیاست آ باور کینہ۔ دا وخت تخریبی سیاست نا اف۔

(آن لائن)