وزیراعظم نا تران تیان قوم اٹ نااومیتی ودی مننگ اٹی ءِ‘ مولانا حیدری
Get real time updates directly on you device, subscribe now.
قلات (تلار حوالکار) جمعیت علماءاسلام نا سیکرٹری جنرل سینیٹر مولانا عبدالغفور حیدری پارینے کہ وزیراعظم نا تران تیان قوم اٹ نااومیتی ودی مننگ اٹی ءِ‘ اسہ کنڈآ وزیراعظم پاہک کہ خلپیرے تو ایلو کنڈآ پاہک کہ کورونا دَین مچ آ ملک اٹ تالان مننگ کیک‘ دا تران تیان قوم اٹ بے چینی تالان مننگ اٹی ءِ۔زلفی بخاری اگہ تفتان آن بے چیک اپ آن زائر آتے ملک اٹ پتریفتوکہ تو کورونا دَین داخس ترندی اٹ تالان متوکہ‘ نن غٹ سیاسی اختلاف آتے اسہ کنڈ کرسا حکومت ءِ تینا خذمت نا سلہ خلکن وپارین کہ حکومت لاک ڈاﺅن کے یا کرفیوخلے نن تفون ان‘ نن حکومت ءِ سلاہ تسن کہ لاک ڈاﺅن اٹ پانزدہ دے اکن دیہاڑی دار مزور تے 7500 روپئی تننگے و اسہ توانا پانزدہ ہزار روپئی تننگے ولے لاک ڈاﺅن ءِ اِرا ہفتہ مسنے داسکان ننا سلاہ تیا ہچ عملدرآمد متنے‘ حکومت زلفی بخاری نا قومی ڈوہ ءِ ڈکنگ کن تبلیغی ہند آتیا چھاپہ خلنگ اٹی ءِ ہراکہ سگ آن پیشن ءُ عمل اسے۔ دا خیال آتا درشانی ءِ او مرکز اسلامی قلات اٹ میڈیا نا نمائندہ غاتتون ہیت وگپ کرسا کرے۔دا وخت آ مرکز اسلامی قلات نا مہتمم مولانا حافظ محمد قاسم لہڑی‘ قاضی فداءالرحمان عادل وایلوفک ہم ساڑی ئسر۔