کوروناوائرس : پد تموک ملک آتے کن 25کھرب ڈالرنا سپورٹ پیکیج نا گرج

اسلام آباد (اے پی پی) پاکستان تون اوار ایلو پد تموک ملک آتا زرگزران تے کورونا جہانی دین آن بھلو دک اس لگانے، زرگزرانی نسخان آتون مون تننگ کن پد تموک ملک آتے 25کھرب ڈالر نا سپورٹ پیکیج نا گرج مریک۔ اقوام متحدہ نا ادارہ واپار و شونداری(یو این سی ٹی اے ڈی) نا رپورٹ نارداٹ پاکستان، ارجنٹائن وافریقی ملک آتے کورونانا دین انا سوب آن ودوک آ وام، افراط زر اٹی ودکی تون اوار جان جوڑی نا بشخ اٹی بھاز ویل آتون مون تروک مریک۔ پد تموک ملک آتا زرگزران آک درملکی زرکاری نا ملک آن پیش تمنگ تون اوار جہانی کہول آ نہاد آتے ٹی کمتی آن برآمد آتے ٹی کمتی و کرنسی نا نہاد آتے ٹی کمتی کون آ ویل آتیان زہمی مننگ کیک دُن کہ 2008 ءنا تنکی ٹی ہم مسوسس۔ یو این سی ٹی اے ڈی نا ڈائریکٹر گلوبائزیشن اینڈ ڈویلپمنٹ سٹریٹجیز رچرڈ کوزل رائٹ پارینے کہ جہانی ادارہ غاتے رپورٹ اٹ پیش کروک آ سلاہ تیا خوڑتی اٹ سجفوئی مریک تانکہ پد تموک ملک آتا زرگزران ءِ مست آن سرمروک آ نسخان و آخبت نا نسخان تیان رکھ فراوان کننگ مرے۔ اوپارے کہ کوروناجہانی دین انا سوب پد تموک ملک آتا زرگزران ءِ 20آن 30کھرب ڈالر نا نسخان مون تروک مریک۔ رپورٹ نارداٹ پد تموک ملک آتیان فروری ومارچ اٹی 59ارب ڈالر نا درملکی زرکاری پیش تمانے وخت اس کہ 2008ءنا تنکی آن زرکاری نا ہننگ نا کچ 26.7ارب ڈالر ئس۔ جہانی ادارہ پارینے کہ پد تموک ملک آتے اینخو سال 25کھرب ڈالرنا سپورٹ پیکیج نا گرج مریک۔ رپورٹ نارداٹ اینخو دا ملک آتے ٹی کیپیٹل مارکیٹ اٹ دہ کھرب ڈالر نا زرکاری ، وام تا پدی تننگ نا بابت دہ کھرب ڈالر نا سپورٹ پیکیج و جان جوڑی نا بشخ اٹی کمکاری کن 5کھرب ڈالر نا کمکاری نا گرج ءِ۔ پد تموک ملک آتے ٹی 170ملک آک اوار ءُ ہرافتے ٹی پاکستان ہم اوار ءِ۔ جی 20ملک آتے جہانی زرگزران نا سیبو و پد تموک ملک آتے زرگزرانی تنکی نا مون ءِ توننگ کن تینا کڑد ءِ ادا کروئی مریک۔