کوروناوائرس نابرخلاف جنگ کروک آ ڈاکٹرآتا ستا ءِ کینہ، وزیراعظم عمران خان

ڈاکٹر آتا رکھ ءِ پک کننگ کن ہروڑنا گام گیج کینہ، پاکستان اٹی دا دین ایلو ملک آتا مون اٹ کم تالان مس و زوال کروک آتا کچ ہم بھاز کم ءِ

اسلام آباد (اے پی پی) وزیراعظم عمران خان کوروناوائرس نا برخلاف جنگ کروک آ ڈاکٹر آتے خراج تحسین پیش کرسا پارینے کہ حکومت و مچ آ قوم اوفتے تون سلوک ءُ ، ڈاکٹر آتا رکھ ءِ پک کننگ کن ہروڑنا گام گیج کینہ، پاکستان اٹی دا دین ایلو ملک آتا مون اٹ کم تالان مس و زوال کروک آتا کچ ہم بھاز کم ءِ، مست دور اٹ جان جوڑی نا بشخءِ گوجالنگا ولے داسہ آسراتی نا فراوانی کن غٹ وسیلہ غاتے کاریم اٹ اتنگ اُن۔ داخیال آتا درشانی ءِ او چارشنبے نادے آ کنٹونمنٹ جنرل ہسپتال راولپنڈ?ی نا بناءِ کننگ نا وخت آ گپ وتران کرساپارے۔ داوخت آ بنجائی وزیر ریلوے شیخ رشید احمد، مرکزی سیکرٹری جنرل پاکستان تحریک انصاف عامر محمود کیانی تون اوار ایلو بڑزکو کمامدارآک ساڑی ئسر۔ وزیراعظم عمران خان پارے کہ 15جنوری آن ننے اندازہ مس کہ چین اٹی کوروناوائرس تالان مننگ ءِ و دا پاکستان آہم بریک، ہمووخت آن نن اونا تیاری ءِ کرینہ۔ ننے احساس ئس کہ دا دین اٹی ڈاکٹرز و طبی عملہ نا فرنٹ لائن نا کڑد ءِ۔ ننے اوفتے رکھ کننگ نا گرج ءِ۔ وزیراعظم پارے کہ تدوک آ 70سال اٹی ملک اٹی جان جوڑی نا بشخءِ گوجالنگا۔ اوپارے کہ 70نا دہائی ٹی ننا جان جوڑی نا بشخ انا حالیت بھاز جوان ئس۔ ننا میڈیکل کالج آتا ڈگری تے جہانی کہول آ امنا کننگاکہ۔ اوپارے کہ بدبختی اٹ مچ آ دنیا ٹی کوروناوائرس نا سوب آن طبی ازباب و وینٹی لیٹرز آتا طلب اٹ ودکی مس، ننا خوش بختی ءِ کہ چین ننے پورو کمک فراوان کرے۔ چینی حکومت کورونادین انا معاملہ غا پاکستان ءِ اولیت تس واینو ہم ہراطبی ازباب آک پاکستان آ بننگ ءُ او چین آن بننگ ءُ۔ وزیراعظم پارے کہ ننا کنٹرول و کمانڈ سینٹر نا اولیت آئی سی یو و ایمرجنسی نا تہہ ٹی کاریم کروک آ اسٹاف ءِ رکھ کننگ ناءِ۔ طبی عملہ ءِ رکھی سازو سامان فراوان کننگانے ولے ہراڑے سرمتنو بروک آ منہ دے اٹی فراوان کننگک۔ وزرااعظم پارے کہ نن غٹ ءِ چانہ کہ داوخت آ دنیا ٹی طبی عملہ غا دباو ¿ ودنگ ءِ، امریکہ کوروناکن کاریم کروک آ ہیلتھ ورکر آتے کن ویزہ غاتے ملانے۔ اینو اوفتا مانگ ءِ انتئے کہ او فرنٹ لائن آ جنگ کننگ ءُ۔ وزیراعظم پارے کہ نن پورووڑاٹ ڈاکٹر و طبی عملہ ءِ سپورٹ کینہ، اللہ تعالیٰ نا کرم ءِ کہ دیکی ملک آتا نسبت نناملک اٹی حالیت آک جتا ءُ۔ داڑے زوال ہم دنیا نا مقابلہ ٹی بے کچ کم ءِ۔ ننا ڈیٹا بننگ ءِ اودے پراسیس کننگ اُن، اسہ ہفتہ اسکان ننے دابارواٹی سہی اندازہ مریک۔ انتس کہ مریک ای باور کرفنگ خواوہ کہ دا قوم و حکومت نم تون سلوک ءُ۔ وزیراعظم داوخت آ ہسپتال نا چندی بشخ و وارڈ آتا دورہ ءِ کرے و ہسپتال اٹی دوئی آسراتی تا جاچ ءِ ہلک۔ داوخت آ وزیراعظم ءِ ہسپتال انتظامیہ نا کنڈآن دوئی آسراتی تابارواٹی حوال ہم تننگا۔