پی ڈی ایم سرکڑدہ غاتا برخلاف ایف آئی آر کننگک

اسلام آباد (اے پی پی) بنجائی وزیر حوالکاری و شینکاری سینیٹر شبلی فراز پارینے کہ عدالت عالیہ نا پرمان تیان پد ہم پی ڈی ایم ملتان جلسہ، اپوزیشن توہین عدالت کرینے، پی ڈی ایم جلسہ منتظم و اوار مروک آ سرکڑدہ غاتا برخلاف ایف آئی آردرج کننگ انگ ءِ، داکان پد ہم ہرا عدالتی پرمان و این سی او سی سلاہ و سوج آتیا رکھ انا خلاف ورزی ءِ کرے اونا برخلاف ہنداوڑ کارروائی کننگک، کورونا دین انا ارٹمیکو ریسہ نا سوب آن مچ آ ملک اٹی جلسہ جلوس آتیا پابندی خلوک ءِ، پی ڈی ایم داسہ لاہور جلسہ نا ہیت کننگ ءِ اوفتے لاہور جلسہ غان توپنہ ولے اوفتا برخلاف کانودی کارروائی المی مریک، نواز شریف، شہباز شریف و مریم نواز تون اوار مسلم لیگ ن نا سرکڑدہ غاتا مچ آ سیاست دروغ آ مبنی ءِ۔ دامخلوق زند اٹی اس ہم راست پاتنو۔ سے شنبے نادے آ وزیراعظم عمران خان نا کماشی ٹی بنجائی کابینہ نا دیوان آن پد خصوصی کمکار جان جوڑی ڈاکٹر فیصل سلطان تون اوار میڈیا ءِ بریفنگ ترسا بنجائی وزیر حوالکاری و شینکاری سینیٹر شبلی فراز پارے کہ اسلام آباد ہائی کورٹ و این سی اوسی نا سلاہ و سوج آتے مون آ تخسا مچ آ ملک اٹی جلسہ جلوس آتیا پابندی خلوک ءِ تانکہ کورونا دین مچی تا کمک اٹ تالان مف اوکان پد ہم اپوزیشن پی ڈی ایم نا پلیٹ فارم آن ملتان اٹی ارٹ میکو جلسہ ءِ کرینے، ملتان نا الس نا منت واری ءِ ہرفنہ، 25لکھ انا آبادی نا علاقہ غان بیرہ منہ ہزار بندغ نا بشخ ہلنگ و سندھ آن اتوک آ 3 ہزار بندغ آتا بشخ ہلنگ دا پک کیک کہ پشاور آن پد ملتان نا الس پی ڈی ایم ءِ مسترد کرینو، ملتان پی ڈی ایم نا جلسہ ٹی نیزگار الس نا ہیت ءِ کننگتو، پی ڈی ایم والاک خرین ءُ ہیت کریر، دا مخلوق جند انا فائدہ و تینا خاہوت آتے فائدہ تننگ تون اوار اوار غیر کانودی دولت نا رکھ اکن داوڑنا ناٹک کننگ ءُ، پی ٹی آئی حکومت داڑان ہبکہ مروک اوس اف، پی ٹی آئی ہنداخہ در بھلو جلسہ کرینے ہرانا ریکارڈ اینو اسکان پِننگ کتنے۔