پاک ایران ہڑتوم آکنڈآتا تعلقداری ءِ پین سوگو کننگک،مٹھا خان کاکڑ

کوئٹہ : وزیراعلیٰ بلوچستان نا سلاہکار حوالکاری حاجی مٹھاخان کاکڑ پارینے کہ پاک ایران ہڑتوم آ کنڈآتا تعلقداری ءِ پین سوگو کننگ کن دودوربیدگی، صحافتی و حکومتی کہول آ ڈل آتا ہن و بر المی ءِ، مکران ءِ بجلی ن افراوانی آ ایران حکومت نا منت واراُن۔ داہیت ءِ او تینا ہنکین آ ایران نا ڈپٹی قونصل جنرل فیریدون پیر لورین، خانہ فرہنگ کوئٹہ نا ڈائریکٹر جنرل سید ابوالحسن میری تون اوڑدہی ٹی گپ وتران کرسا پارے۔ صوبائی سلاہکار پارے کہ سعودی عرب و ایران نا نیام اٹ تعلقداری ٹی گچینی امت مسلمہ نا فائدہ ٹی ءِ، پاکستان و ایران یک جان و اِرااست ءُ، ہڑتوم آ ملک آتا نیام اٹ واپاری و دودوربیدگی تعلقداری تے پین گچین کننگ کن پارلیمانی وواپاری ڈل آتاہن و بر المی ءِ، وزیراعظم شہباز شریف و ایران نا صدر ابراہیم رئیسی نا نیام اٹ اوڑدہی آن دوستانہ تعلقداری پین پائیدار مریک۔ داوخت آ ایران نا ڈپٹی قونصل جنرل فیریدون پیر لورین پارے کہ ایران پاکستان ءِ اڑزان بجلی و گیس انا فراوانی کن ہروخت تیار ءِ، ہڑتوم آ ملک آتا نیام اٹ واپاری کچ ءِ ودفنگ کن پوریاگر برادری و حکومتی وزیر آک اہم ءُ کڑد اس ادا کننگ کیرہ، کوئٹہ غان تہران و مشہد کن براہ راست جہاز آتا جاری و کوئٹہ تفتان ریلوائی ٹریک نا گچینی آن زائر، پوریاگرآتون اوار غٹ تپہ نا بندغ آتے آسانی فراوان مریک۔

(اے پی پی)