شونداری اسکیم آتا بابت مانیٹرنگ نظام اٹ گچینی اتنگے، جام کمال

کوئٹہ(اے پی پی) وزیراعلیٰ بلوچستان جام کمال خان شونداری محکمہ غاتے پی ایس ڈی پی ٹی اوار شونداری اسکیم آتا مانیٹرنگ نا نظام ءِ جوڑ کننگ و مسہ توئی جاچ دیوان اڈتننگ نا پارت کرسا پارے کہ ڈٹ ڈَول آتا پوروی ٹی تل وَل، فنڈ آتا زیان و لیپس مفننگ کن صوبہ نا تاریخ اٹی اولیکو وار ساڑی صوبائی حکومت پوسکن آ مالی سال انا بناآن شونداری ڈٹ آتا عملدرآمد نا بناءِ کننگ نا روایت اسے نا بناءِ کرینے، ہراڑان شونداری عمل نا بھرم آک وخت آ الس اسکان سرمریرہ۔ داخیال آتا درشانی ءِ او تدوک آ مالی سال انا پی ایس ڈی پی نا جاچ و اینخو مالی سال انا پی ایس ڈی پی آ عملدرآمد نا بنانا بابت باندات آتا جاچ دیوان اٹی کرے۔ صوبائی وزیر خزانہ میر ظہور بلیدی، چیف سیکرٹری بلوچستان فضیل اصغر، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نورالحق بلوچ، سیکرٹری مواصلات و تعمیرات نورالامین مینگل، سیکرٹری گوازی عمران گچکی و ایلو تعلقدار کمامدارآک دیوان اٹی بشخ ہلکر۔ دیوان اٹی وزیراعلیٰ نا گائیڈ لائن نا رداٹ شونداری ڈٹ آتا منظوری نا کمیٹی پی ڈی ڈبلیو پی و ڈی ایس سی نا کارروائی کن چیک لسٹ و ٹی او آرز جوڑ کننگ و محکمہ غاتا سلابت اٹ کمیٹی تا دیوان اڈتننگ نا سہ ماہی شیڈول نا جاری کننگ نا فیصلہ کننگا ہرانا مسخت پوسکن آ شونداری ڈٹ آتا وخت آ بنا و اوفتیا ترند رفتار عملدرآمد نا کمک اٹ وخت انا بچت و فنڈ آتا گچین کاریم اٹ اتنگ ءِ پک کننگ ءِ، دیوان اٹی ڈٹ آتا فنڈ آتا منظوری و اتھرائزیشن نا پالیسی نا ہم منظوری ءِ تننگا وخت اس کہ پوسکن آمالی ایکٹ نا رداٹ محکمہ غاتے بروک آ مالی سال اکن ہم پوسکن آ ڈٹ آتا کانسیپٹ پیپر و پی سی 1 نا تیاری نا پارت کننگا، دیوان اٹی منجمد اسکیم تا جاچ ءِ ہلنگ کن چیف سیکرٹری نا کماشی ٹی ٹیکنیکل کمیٹی نا ٹہیفنگ نا فیصلہ ءِ کننگا ہرا چندی سوب آن منجمد کروک آ اسکیم تا سرجم جاچ ءِ ہلسا تینا سلاہ و سوج آتے کابینہ نا ذیلی کمیٹی ءِ پیش کیک و اوکان پد اوفتے حتمی فیصلہ کن کابینہ نا مون آ اتنگے، داکان مست اے سی ایس شونداری دیوان ءِ معلومدار کرے کہ تدوک آ مالی سال اٹی ہشت ارب روپئی نا خڑچ آن 1437اسکیم آتے پورو کننگا وخت اس کہ مالی سال 2020-21ء   نا شونداری پروگرام اٹی 2568 ڈٹ اوار ءُ ہرافتیان 934 پوسکن ءُ و 1434برجاڈٹ ءُ، وزیراعلیٰ پارت کرے کہ ڈٹ آتا وخت آ و آب اٹ پوروی ءِ ہرحال اٹ پک کننگے۔