سی ای او کیسکو نا آن لائن کچہری اس اڈہلک، صارف آتے ویل آتا بِنگ
Get real time updates directly on you device, subscribe now.
کوئٹہ الیکٹرک سپلائی کمپنی (کیسکو) نا چیف ایگزیکٹو آفیسر کیسکو انجینئر مرزا اعزاز بیگ نا چاروکی ٹی صارف آتا غاوتا چٹفنگ کن آن لائن غاو دیوان اڈ تننگا۔ ہراٹی کیسکو نا چیف انجینئر (کسٹمر سروسز) سید مطاہر حسین مشہدی، سپرنٹنڈنگ انجینئر (سینٹرل) سرکل عبدالناصر مندوخیل تون اوار ایلو تعلقدار افسر آک ہم ساڑی ئسر۔ ترجمان کیسکو نا رداٹ آن لائن غاو دیوان اٹ کوئٹہ شار اتون اوار صوبہ نا کل آپریشن سرکل آتا چندی علاقہ غاتیان صارف آک فون آ حوال کرسا چیف ایگزیکٹو آفیسر کیسکو ءِ تینا علاقہ غاتا بجلی نا بابت ویل و غاوتیان معلومدار کریر۔ ہرافتا چٹفنگ کن او ہمووخت آ تعلقدار کمامدارآتے پرمان جاری کرے۔ داوخت آ چیف ایگزیکٹو آفیسر کیسکو انجینئر مرزا اعزاز بیگ آن لائن غاودیوان اٹ صارف آتتون ٹیل فون آ گپ وتران کرسا پارے کہ صارف آتا غاوتا وخت آ پورو کننگ ننا اولیت ءِ و دامسخت کن کیسکو نا کل آپریشن سرکل آتیٹی آن لائن غاو دیوان اڈ تننگک ہرانا کل آن زیات فائدہ صارف آتے دوئی مریک انتئے کہ دا گام آن صارف آتا ویل کم آن کم وخت اٹ ایسر کننگ مریک۔ داکان بیدس اوفون آ حوال کروک آ کل صارف آتیان خواست کرے کہ او تینا بجلی نا بل آتا وخت آ جمع کننگ تون اوار اوار تینا زمہ سلوک آپیسہ غاتے ہم جمع کرفر۔ داکان بیدس کل صارف آک تینا دامون ایمون بجلی نا کانود آن چَپ کاریم اٹ اتوک بجلی دُزآتا پیدواری ءِ کننگ اٹی ہم کیسکو تون کمک کیر۔