مخلوق ءِ مون تروک طبی ویل آتا ایسری کن حکمت عملی جوڑ کننگے،فریدہ ترین

صحبت پور، ڈپٹی کمشنر صحبت پور فریدہ ترین نا کماشی ٹی ضلعی ہیلتھ کمیٹی نا دیوان اڈ ہلک، ہراٹی مچ آ ضلع نا سرکاری جانجوڑی ہند آتا جم کارکڑد،الس ءِ فراوان کروک طبی آسراتی، طبی کارندہ غاتا حاضری، پوسکن جوڑ مروک بنداوی جانجوڑی ہند آتے المی فرنیچر نا فراوانی و جانجوڑی بشخ اٹی مون تروک ویل آتا جم جاچ ءِ ہلنگا۔ دیوان اٹ پوسکن جوڑ مروک بنداوی جانجوڑی ہند آتے ٹی فرنیچر و ایلو المی آسراتی تا فراوانی، بی ایچ یو نورپور ءِ 24 گھنٹہ فعال کننگ، ڈیوٹی آن غیر حاضر ملازم آتا برخلاف کارروائی، مانیٹرنگ رپورٹ آتا جاست پاست و تعلقدار افسر آتا فیلڈ وزٹ تون اوار چندی اہم باندات آتیا گپ وتران کننگا‘ دا وخت آ دا ہیت آ زور شاغنگا کہ ضلعی کہول آ جانجوڑی نا آسراتی تے گچین و فعال جوڑ کننگ کن کل تعلقدار افسر آک تینا زمواری تے پورو کیر و الس ءِ مون تروک طبی ویل آتا ایسری کن جم حکمت عملی اس پک کننگے‘ ڈپٹی کمشنر فریدہ ترین تعلقدار کمامدار آتے پارت کرے کہ پوسکن جوڑ مروک بنداوی جانجوڑی ہند آتے ٹی المی فرنیچر و ایلو بنداوی آسراتی تا فراوانی ءِ پک کننگے تاکہ دا ہند آتے پورو وڑ اٹ فعال جوڑ کرسا الس ءِ اوفتا درگہ غا طبی آسراتی فراوان کننگ مرے۔ او خصوصی وڑ اٹ بی ایچ یو نورپور ءِ 24 گھنٹہ فعال کننگ کن عملی گام گیج کننگ نا پارت کرے و پارے کہ جانجوڑی نا آسراتی تا وخت آ رسینگ گیگ الس نا بنداوی حق ءِ ہندا سوب آن دا رد اٹ ہچ وڑ انا ڈیوالئی و بے پراوہی ءِ سگنگ مفک۔ ڈپٹی کمشنر مستی پارت کرے کہ مچ آ ضلع نا کل سرکاری جانجوڑی ہند آتے ٹی ڈاکٹر، پیرامیڈیکل اسٹاف و ایلو تعلقدار ملازم آتا حاضری ءِ پک کننگے۔ او پیدوار کرے کہ سرکاری ملازم آتا زمواری ءِ کہ او پک کروک وخت آتیٹی تینا ڈیوٹی ءِ سر ایتر و ناجوڑ آتے وخت آ طبی کمک فراوان کیر۔ ڈیوٹی آن غیر حاضر مروک کارندہ غاتا برخلاف قاعدہ و ضابطہ نا رِد اٹ کارروائی کننگے تاکہ سرکاری ادارہ غاتیٹی نظم و ضبط برجا تخنگ مرے و الس ءِ درمان نا دوئی کننگ اٹی مشکل مون تروئی تمپ۔