خیبرپختونخوا ٹی گورنر راج، ایمرجنسی ءِ منپنہ، نن تون وعدہ خلافی کننگا،مولانا فضل الرحمن

اسلام آباد، جمعیت علماء اسلام نا امیر مولانا فضل الرحمان حکومت نا خیبرپختونخوا ٹی گورنر راج و ایمرجنسی نا گام ءِ پورو وڑ اٹ مسترد کرسا پارینے کہ جے یو آئی الس، عدالت و پارلیمان تون اوار ہر جاگہ غا کاہک و آئینی حق آتا بحالی نا جہد برجا تخک۔ او پیدوار کہ دا غیر آئینی گام انا مون آ اسہ ساہت اسے کن ہم کاٹم ءِ شیف کننگ کن تیار افن‘ پریس کانفرنس آن تران کرسا مولانا فضل الرحمان تدوک آ منہ دے انا مذاکراتی عمل نا جم حوال ءِ ترسا پارے۔ او پارے کہ ہفت اکتوبر آ او عمرہ غان پدی بس تو اپوزیشن لیڈر سینٹ تون اوار اپوزیشن راہشونک اوڑا بسر و کڑد ادا کننگ نا خواست کریر۔ ایلو دے آ بنجائی وزیرک ہم کنے آبسر و ہڑتوم آ فریق آک کنے خیرخواہی کڑدار ادا کننگ نا پاریر‘ مولانا فضل الرحمان پارے کہ ہمو وخت آ لانگ مارچ برجا ئس و کنا سلاہ غا اسلام آباد آ ہننگ آن پاندار کننگا۔ بروک آ دے ایمرجنسی خلوئی ئس ولے حکومتی ڈل انا بننگ آ ایمرجنسی پد بٹنگا۔ اوکان پد وزیراعظم اودے اوڑدہی کن خوائفے۔ مولانا فضل الرحمان پارے کہ ای پک ئسٹ کہ حکومت فیصلہ ءِ تے کرینے ولے سنگت آتا سلاہ غا ای وزیراعظم ہاؤس آ ہناٹ‘ حکومت پیدوار پارے کہ اول لانگ مارچ ءِ چٹفنگے وخت اس کہ پی ٹی آئی نا خواست ئس کہ عمران خان تون اوڑدہی کننگے و اودے ہسپتال دننگ نا عدالتی فیصلہ غا عمل کننگے۔ ہڑتوم آ فریق آک ”اول نی“ نا ہیت ءِ کریرہ۔