صوبہ خیبرپختونخوا ٹی ایمرجنسی نا نفاذ نا مذمت ءِ کینہ، اسُل منپنہ تے،بیرسٹر گوہر

اسلام آباد، چیئرمین پی ٹی آئی بیرسٹر گوہر خان صوبہ خیبرپختونخوا ٹی ایمرجنسی نا نفاذ نا سخت انگا لوزآتے ٹی مذمت ءِ کرسا پارینے کہ دا گام ءِ پورو وڑ اٹ مسترد کینہ، الس تینا حق آتا برخلاف دن انگا گام گیج آتے ہچ گہس امنا کپک، صوبہ غاتے نزور کرسا بنجا سوگو مننگ کپک۔ بنجا ایگو ءِ یلہ کے، ڈغاری راستی تے پہہ مرے، روا انگا خواست آتے امنا کے، الس نا احساس و جوزہ غاتا شرف ءِ کے۔ خیبرپختونخوا ٹی ایمرجنسی نا نفاذ آ ردِعمل اٹی چیئرمین پی ٹی آئی بیرسٹر گوہر خان پارے کہ نن صوبہ ٹی ایمرجنسی نا نفاذ نا سخت انگا لوز آتے ٹی مذمت ءِ کینہ و دا گام ءِ پورو وڑ اٹ مسترد کینہ۔ دا اسہ بے کچ گڑتی و بھلو سیاسی ردینک و غیر جمہوری گام اسےِ۔ الس تینا حق آتا برخلاف دن انگا گام گیج آتے ہچ گہس امنا کپک۔ خیبرپختونخوا نا الس نا مینڈیٹ اوفتا آئینی و کانودی حق ءِ۔ دا مینڈیٹ ءِ گوجالسا صوبائی وتواجہی ءِ نزور کرسا و بنجا و صوبہ نا نیام اٹی جھیڑہ ودی کرسا نئے امن مننگ کیک و نئے سوگوی اتنگ مریک‘ او پارے کہ دہشت گردی نا چٹفنگ آ ہچ ءُ اختلاف اس اف، ولے دہشت گردی نا برخلاف جنگ ءِ السی توار ءِ چپ تننگ‘ سیاسی مسخت تا دوئی کننگ یا صوبہ نا آئینی واکداری تے کچ اٹ کننگ نا وڑ جوڑ کننگ کپک۔ بیرسٹر گوہر پارے کہ دہشت گردی نا مون ءِ قومی سیوت و اسیجائی حکمتِ عملی اٹ توننگ مریک‘ صوبہ غاتے نزور کرسا بنجا سوگو مننگ کپک۔ ویل آتا ایسری واک، جھیڑہ و گمان آن چَپ گام گیج آتیٹی اف بلکہ سیاسی بصیرت، آئین نا بالادستی و بھرم تروک مذاکرات و عملی گام گیج آتیٹی ءِ۔ چیئرمین پی ٹی آئی پارے کہ نن السی مینڈیٹ، صوبائی وتواجہی و آئینی و جمہوری حق آتا رکھ اکن ہر آئینی، کانودی و جمہوری فورم آ پورو توار چست کینہ۔