عالمی یومِ اساتذہ آ ہوپ پبلک ہائی اسکول بسیمہ ٹی پروقار دود

بسیمہ، عالمی یومِ اساتذہ نا موقع غا محکمہ ہائر ایجوکیشن نا زیرِ اہتمام ہوپ پبلک ہائی اسکول بسیمہ ٹی اسہ پروقار و زیبائی تقریب اس اڈ ہلک، ہراٹی نودربر، پرنسپل، استاد آک و ایلو تعلقدار بندغ آک پُرر بشخ ہلکر۔ تقریب نا مسخت استاد تا خذمت، اوفتا محنت، رہنمائی و راج نا تعمیر و شونی اٹی اوفتا بنداوی کڑد ءِ پاش کننگ ئس۔ تقریب نا باقاعدہ بنا تلاوتِ کلامِ پاک آن مس ہرانا سعادت مولوی عبدالرحمان حاصل کرے المعنیٰ۔ تلاوتِ قرآن پاک آن پد نودربر آک عالمی یومِ اساتذہ نا مناسبت اٹ جتا پروگرامک پیش کریر ہرافتے ٹی تقریرک، ڈرامہ و جتا ٹیبلو اوار ئسر۔ نودربر آک تینا صلاحیت تا بھرمی مظاہرہ ءِ کرسا استاد تا عظمت، احترام، شفقت، محنت و تعلیمی و تربیتی خذمت آتے زیبائی انداز اٹ پاش کریر۔ نودربر تا کنڈ آن پیش کننگوک آ جتا پروگرام آتیٹی دا ہیت ءِ نمایاں کننگا کہ استاد محض کتابی علم گدریفواک بندغ اس اف بلکہ او نودربر تا شخصیت سازی، کُرد سازی، اخلاقی تربیت و آخبت نا سمٹ پٹ کننگ اٹی کلیدی کڑد ادا کیک۔ نودربر تا جتا ٹیبلو و ڈرامہ غاتیٹی استاد و شاگرد نا باہمی احترام، استاد نا محنت و تعلیم نا اہمیت ءِ پاش کننگا ہرافتے تقریب اٹی ساڑی شرکاء بھلو سستار و نودربر تا صلاحیت تا تعریف ءِ کریر۔ تقریب آن تران کرسا پرنسپل محمد عارف و ایلو استاد آک پاریر کہ استاد کسی بھی راج نا تعمیر و شونی اٹی بنداوی ستون نا حیثیت تخک۔ اسہ جوان ءُ استاد اس تینا شاگرد آتے بیرہ نصابی تعلیم اسکان محدود تخپک بلکہ اوفتا اخلاقی تربیت، شخصیت سازی و کُرد نا تعمیر نا وسیلہ اٹ اوفتے راج نا زموار، باکُرد و مفائید مند شاری جوڑ کننگ اٹی اہم کڑد ادا کیک۔ مقررین تا پاننگ ئس کہ استاد تا محنت، خلوص، رہنمائی و تربیت ہی نودربر تا روشنا آخبت نا بنداو بنیک۔ کسی بھی قوم نا شونی نا انحصار معیاری تعلیم و گچین تربیت آ مریک،خت اس کہ معیاری تعلیم نا فراوانی اٹی استاد تا کڑد بنداوی اہمیت تخک۔ او پاریر کہ استاد تینا علم، تجربہ و تربیت نا وسیلہ اٹ پوسکن آ نسل نا فکری و اخلاقی بنداو ءِ سوگو کیک، دا سوب آن راج اٹی استاد تا مقام و احترام ءِ مدام مون آ تخوئی تمو۔ دا موقع غا استاد آک و نودربر آک بھی عالمی یومِ اساتذہ نا حوالہ اٹ تینا خیالات تا درشانی ءِ کریر و استاد نا اہمیت، احترام و راج اٹی اونا کڑد آ روشنائی ششار۔ (نامہ نگار)