ہزارہ قوم اولیکو دے آن مثبت سیاسی کڑد ادا کرینے و بلوچستان ءِ تینا وطن تکانے، اسلم بلوچ

کوئٹہ، نیشنل پارٹی بلوچستان نا صوبائی صدر چیئرمین اسلم بلوچ، نیشنل پارٹی ضلع کوئٹہ نا صدر حاجی عطا محمد بنگلزوئی و ضلعی یوتھ سیکرٹری عنایت بزدار علمدار روڈ و ہزارہ ٹاؤن نا پارٹی سنگت آتتون علمدار روڈ آ اوڑدہی کریر، اوفتا تحفظات آتے دور کرسا اوفتے پارٹی اٹی فعال کڑد ادا کننگ آن تعلقدار ہیت و تران کریر؛ اوڑدہی اٹی شبیر حسین ہزارہ، جواد آفاقی، اسحاق حیدری، جعفر اصغری، حماد حسین، رحیم شاہ سید، رحمت علی، دوست محمد دوستو، کاظم حسین ہزارہ، سجاد علی و اعجاز احمد اوار ئسر، ہرافک تینا تحفظات نا درشانی ءِ کریر؛ پارٹی نا صوبائی صدر اسلم بلوچ پارے کہ نیشنل پارٹی اسہ سیاسی و جمہوری جماعت اس ہے ہراس بلوچستان نا کل اقوام، زبان، ثقافت و نسل آن تعلق تخوک آ بندغ آتے عزت و قدر نا خن اٹ ہُرک؛ ہزارہ قوم تو اولیکو دے آن بلوچستان نا ترقی پسند و جمہوری سیاست نا بشخ مرسا بلوچستان ءِ تینا وطن تکانے؛ او پارے کہ نیشنل پارٹی اسہ جمہوری جماعت اس ہے اونا کل فیصلہ تے پارٹی ادارہ غاک کیرہ؛ بلوچستان نا ساڑی حالیت آتیٹی کل خوانوک آ با شعور بندغ آتے پُرر انداز اٹ تینا سیاسی کڑد ءِ ادا کروئی تمو و اسہ مدامگی مثبت سیاست کن نیشنل پارٹی خوانوک آ نظریاتی و سیاسی کارندہ تا منظم ءُ پلیٹ فارم اس ہے؛ کل غیر فعال سنگت آتآن خواست ہے کہ پارٹی اٹی فعال کڑد ادا کرسا نیشنل پارٹی ءِ علمدار روڈ و ہزارہ ٹاؤن اٹی فعال جوڑ کننگ کن تینا پُرر کڑد ءِ ادا کیر؛ دا موقع غا ضلعی صدر نیشنل پارٹی کوئٹہ حاجی عطا محمد بنگلزوئی پارے کہ کل سنگت آک پدریسہ نیشنل پارٹی نا بشخ ءُ و پارٹی کن اوفتا کوشست آتآن کس انحراف کننگ کپک، لہٰذا سنگت آک پارٹی سرجز آتیٹی پُرر کڑد ادا کیر؛ دا موقع غا سید رحیم شاہ تینا برانزی استعفیٰ ءِ پد ہلک و کل سنگت آک دا ہیت نا اعادہ ءِ کریر کہ او پارٹی ءِ ہزارہ ٹاؤن و علمدار روڈ اٹی منظم کننگ اٹی پُرر کڑد ادا کیرو و ودیک سنگت آتتون رابطہ کرسا کل سنگت آتے ٹیم نا دروشم اٹی فعال کرسا پُرر سیاسی کڑد ادا کیرو۔