بلوچستان اٹ توانائی نا رکھ ءِ پک کننگ کن گام گیج کننگے،نائب وزیراعظم

اسلام آباد، نائب وزیراعظم و وزیر خارجہ سینیٹر محمد اسحاق ڈار سوئی سدرن گیس کمپنی لمیٹڈ (ایس ایس جی سی ایل) نا گیس انا ودوک آ بے حساب مروک نسخان (یو ایف جی) نا ویل آ بڑزکو کہولی کمیٹی نا دیوان نا کماشی ءِ کرے۔ جمعہ نادے آدفتر خارجہ نا ترجمان نا کنڈآن جاری بیان نا رداٹ کمیٹی ءِ ایس ایس جی سی ایل نا نیٹ ورک ءِ مون تروک اہم آپریشنل چیلنج، مالی اثرات و ودوک آ ترسیلی زیان تابارواٹ حوال تننگا۔ دیوان اٹ غیر کانودی کنکشن تا توننگ، پائپ لائن نا بنداوی پنجرنا گچینی، محصول آتا وصولی ٹی ودکی و رواصارف آتیکن گیس انا فراوانی ءِ سوگو کننگ کن تزویراتی گام گیج آتا جاچ ءِ ہلنگا۔ نائب وزیراعظم و وزیر خارجہ بلوچستان اٹ توانائی نا رکھ ءِ پک کننگ تون اوار اوار ایس ایس جی سی ایل نا آپریشنل و مالیاتی پائیداری ءِ بحال کننگ نا اہمیت آ زور شاغا۔ او تعلقدار کمامدارآتے پارت کرے کہ یو ایف جی زیان آتیٹی کمتی، سخت ضابطہ غاتا نفاذ، السی وسیلہ غاتا رکھ و السی آسراتی ءِ پک کننگ کن ہدف و مقررہ وخت آ تالان حکمت عملی اس جوڑ کننگے۔ دیوان اٹ بنجائی وزیر سائنس و ٹیکنالوجی خالد حسین مگسی، بنجائی وزیر پٹرولیم علی پرویز ملک، بنجائی وزیر پبلک افیئرز یونٹ رانا مبشر اقبال، وزیراعظم نا خاص کمکار طارق باجوہ، سیکرٹری داخلہ، سیکرٹری پٹرولیم، چیف سیکرٹری بلوچستان، و وزارت توانائی و وزارت خارجہ نا سینئر کمامدارآک بشخ ہلکر۔