آجو زرگزران نا سوگوی، کیپٹل مارکیٹ اٹ نمان پیش رفت مننگ ءِ‘سینیٹر محمد اورنگزیب

اسلام آباد، بنجائی وزیر خزانہ و محصولات سینیٹر محمد اورنگزیب پارینے کہ آجو زرگزران نا سوگوی، کیپٹل مارکیٹ و نجکاری نا عمل اٹ نمان پیش رفت مننگ ءِ، اصلاحات نا مسخت ملکی و جہانی زرکاری کن پین گنجائشت ودی کننگ و زرگزران ءِ زرکاری آ تالان و برآمدات آتیا مرکوز شونہالی نا کنڈ آدننگ ءِ۔ دا ہیت ءِ او جمعہ نادے آ داڑے پاکستان اٹ برطانوی ہائی کمشنر جین میریٹ تون اوڑدہی ٹی پارے۔ اوڑدہی ٹی پاکستان نا اقتصادی اصلاحات نا اولیت و پاکستان و برطانیہ نا نیام اٹ واپارو زرکاری نا کمک ءِ پین گہراکننگ نا وارخواہی تیا گپ وتران کننگا۔ دا وخت آ ڈویلپمنٹ ڈائریکٹر سیم والڈاک و سینئر اکانومسٹ لوئی ڈین اسک ہم ساڑی ئسر۔ وزیر خزانہ برطانوی ہائی کمشنر ءِ بخیرکریوتکنیکی کمک، مہارت و علم انا ہل وتس نا کمک اٹ پاکستان نا زرگزرانی اصلاحات نا کوشست آتے کن برطانیہ نا پدریسہ کمکاری نا ستاءِ کرے۔ او پارے کہ پاکستان سوگوی آن پائیدار، جامع و زموارانہ شونداری نا کنڈ آ پیش رفت کرینے۔ ہراٹی پیداواریت، زرکاری، برآمدات و روزگار آ ودوک آ چکار کننگ انگ ءِ۔