قلات نا ورناتے ٹی بھاز لائخی ارے‘ عائشہ زہری

قلات اٹی کرکٹ نا شون تننگ و ورنا گوازی گر تے گوازی تا گچین وارخواہی تا فراوانی نا رد اٹ قلات سپر لیگ کرکٹ ٹورنامنٹ نا بنا‘ 12 فرنچائز تیکن تیار کروک یونیفار تا مون پاشی نا دود ڈسٹرکٹ کونسل ہال قلات اٹی اڈ ہلک؛ دود انا خاص انگا مہمان ڈپٹی کمشنر قلات انجینئر عائشہ زہری ئس‘ دود اٹی ٹینس بال کرکٹ ایسوسی ایشن نا صدر وحید مینگل، حاجی خیر جان شاہوانی، عزیز مینگل، حاجی نسیم شاہوانی، جاوید چوہدری، قیوم چنگیز، حفیظ مینگل، کیپٹن یحییٰ، جبار دہوار، مقبول گل محمدشہی، میر احمد لانگو، یاسر زہری، نبی بخش انجم تون اوار گوازی گر و گوازی تتون تعلقدار بندغ آتا بھلو کچ اس بشخ ہلک‘ دود آن تران کرسا ڈپٹی کمشنر قلات انجینئر عائشہ زہری پارے کہ گوازی ورناتا لائخی تے مثبت کنڈآ دننگ‘ دراخ جوڑ راج جوڑ کننگ و ورنا چین اٹ نظم و ضبط، ٹیم ورک و سگ انا شون تننگ اٹ اہم کڑدار ادا کیرہ۔ قلات نا ورناتے ٹی بھاز لائخی ارے‘ ہرافے جوان وارخواہی و آسراتی فراوان کرسا ملکی کہول آ مونی دننگ مریک‘ ضلعی انتظامیہ گوازی تا شون و ہندی گوازی گر تا است بڈی کن ہر وڑ انا کمک ءِ برجا تخک۔ او قلات سپر لیگ نا اڈ ہلنگ ءِ ستاکڑزوک گوندسا منتظم و گوازی گر تیکن نیک انگا استخواہی تا درشانی ءِ کرے؛ دا وخت آ ٹورنامنٹ نا آرگنائزر سلیم کیف نا کنڈآن 12 فرنچائز آتیکن تیار کروک یونیفارم تے ڈپٹی کمشنر انجینئر عائشہ زہری فرنچائز آتا مالک آتے تس۔ دود انا اخیر اٹ ڈپٹی کمشنر ٹورنامنٹ نا سرسہب اڈ ہلنگ و کل ٹیم تیکن نیک استخواہی تا درشانی ءِ کرے۔