غیرنصابی سرجز آک مسن تا لائخی و تینے آ پت ءِ ودفرہ‘راحیلہ حمید خان درانی

کوئٹہ، صوبائی وزیر تعلیم راحیلہ حمید خان درانی گورنمنٹ گرلز ڈگری کالج کواری روڈ کوئٹہ اٹی سائنس و آرٹس ایگزیبیشن نا اڈ تننگ نا ستاءِ کرسا پارینے کہ دا وڑنا غیر نصابی سرجزآک خوانوک آ مسن تاتخلیقی لائخی، سائنسی و پٹ وپولی سوچ و خوداعتمادی نا مون آ دننگ اٹ بھلو کڑد اس ادا کیرہ۔ دا وخت آ ڈائریکٹر کالجز پروفیسر محمد حسین بخش بلوچ، جوائنٹ ڈائریکٹر کالجز گودی سعیدہ نیاز و ایجوکیشن اسپیشلسٹ گودی سعدیہ فاروقی ئسک ہم ساڑی ئسر۔ او نمائش اٹ خوانوک آ مسن تا کنڈآن پیش کروک آ سائنسی و تخلیقی پروجیکٹ آتا جاچ ءِ ہلک و خوانوک آ مسن تا جہد نا ستاءِ کرے۔ بشخ ہلوک آتون ہیت کرسا صوبائی وزیر تعلیم پارے کہ بلوچستان نا خوانوک آ مسن تیٹی بے کچ لائخی ارے و اوفتے تینا لائخی تا درشانی ءِ کننگ کن گچین تعلیمی وارخواہی و سازگار چاگڑد فراوان کننگ صوبائی حکومت نا اولیت آتیٹی اوار ءِ۔ او پارے کہ سائنس و آرٹس نا سرجزآتا کمک اٹ خوانوک آ مسن تے پوسکن آ خواست آتا رداٹ تیار کننگ تون اوار اوفتے ٹی پٹ وپول، تخلیق و عملی آزموندہ غاتا رجحان ءِ ودی کننگ مریک۔