یونیورسٹی تا ویل آتا ایسری کن گام گیج کننگک‘شعیب نوشیروانی

کوئٹہ، صوبائی وزیر خزانہ میر شعیب نوشیروانی نا کماشی ٹی یونیورسٹیز فنانس کمیشن (UFC) نا دیوان اڈ ہلک، ہراٹی سیکرٹری خزانہ جہانگیر کاکڑ، سیکرٹری کالجز ہاشم غلزئی و صوبہ نا یونیورسٹی تا وائس چانسلرز و نمائندہ و ایلو تعلقدار کمامدار آک بشخ ہلکر۔ دیوان اٹی مالی سال 2026-27 اکن یونیورسٹی تیکن جتا کروک 8 ارب روپئی نا فنڈ انا بشخ وپانٹ ونا وڑوڈول و سلاہی فارمولا غا جم سجنگا۔ دا وخت آ صوبہ نا یونیورسٹی تے مون تروک مالی ویل و گرج آتا جم جاچ ءِ ہلنگا۔ یونیورسٹی تا نمائندہ غاک یونیورسٹیز فنانس کمیشن نا فورم آ تینا یونیورسٹی ءِ مون تروک مالی مشکل و ایلو ویل آتیان معلومدار کریر۔ دا وخت آ صوبائی وزیر خزانہ و معدنیات میر شعیب نوشیروانی باوری کرفے کہ یونیورسٹی تا ویل آتا ایسری کن کل تعلقدار باندات آتے بڑزکو کمامدار آتا نوٹس اٹی اتنگک و اوفتا ایسری کن وس انا کچ آ کوشست کننگک دیوان اٹی یونیورسٹی تا نمائندہ غاک تنخواہ و پنشن نا ویل آتا ایسری کن صوبائی وزیر خزانہ، یونیورسٹیز فنانس کمیشن و حکومتِ بلوچستان نا منتواری ءِ ہرفیر۔ او پاریر کہ حکومت نا کنڈ آن وخت آ گام گیج آتا سوب آن دا وخت آ یونیورسٹی تے تنخواہ و پنشن تننگ نا بابت ہچ ءُ ویل اس مون تروک اف۔ دیوان اٹی خاص وڑ اٹ یونیورسٹی آف بلوچستان نا پنشن زرتس آتا باندات ا پیش رفت آن معلومدار کننگا۔ حکومت بلوچستان نا منظوری اٹ محکمہ خزانہ یونیورسٹی آف بلوچستان ءِ 50 کروڑ روپئی وام تیکن فراوان کرینے تاکہ یونیورسٹی نا متکن آ پنشن زرتس آتا ویل انا ایسری ٹی کمک مننگ کے صوبائی وزیر خزانہ میر شعیب نوشیروانی پارے کہ حکومت بلوچستان صوبہ نا یونیورسٹی تے مون تروک مالی مشکل آتا ایسری و بڑزکو تعلیم نا شون تننگ کن ساڑی وسیلہ غاتے ٹی کمکاری ءِ برجا تخک۔ اوپارے کہ یونیورسٹی تا مالی سوگوی بیرہ استاد و ملازم آتا ویل آتا ایسری کن المی اف بلکہ آب اٹنگا تعلیم و پٹ پول نا ریسہ کن ہم بھاز اہمیت تخک۔