کے پی کے صوبائی حکومت نا طب ہم خراب ءِ و نیت تے ہم،عطاء اللہ تارڑ

اسلام آباد، حوالکاری وشینکاری نابنجائی وزیر عطاء اللہ تارڑ پارینے کہ خیبرپختونخوا دہشت گردی نا خاخر اٹی ہشنگ انگ ءِ وخت اس کہ صوبائی سرکڑدہ غاک اسہ بندی اسے یلہ کرفنگ کن تینا کل واک آتے خڑچ کننگ اٹی ءِ‘ دوشنبے نا دے بنجائی وزیر حوالکاری تون اوار پریس کانفرنس آن تران کرسا وزیر مملکت داخلہ طلال چوہدری خیبرپختونخوا ٹی دہشت گردی نا سخت انگا لوز آتے ٹی مذمت ءِ کرسا صوبائی حکومت آ دوبہ خلک کہ او سیکورٹی فورس آتے المی وسیلہ غاتا فراوانی و دہشت گرد آتا برخلاف پیدوار موقف تینائی کننگ اٹ بے سہب مسنے۔ وزیر مملکت پارے کہ منہ دے مست امن میلہ چیک پوسٹ آ دہشت گرد آک جلہو کریر ہراٹی زالبول و چناتتون اوار بھلو کچ اسے ٹی سویلین و اِرا ریسکیو کارندہ ہم شہید مسر۔ او پارے کہ سوشل میڈیا غا جاری فوٹیج و فوٹو آت جاچ آن دا ہیت مون آ بس کہ دہشت گرد آتا تعلقداری اوغانستان آن ئس۔ طلال چوہدری مستی پارے کہ ہرا وخت ننا بندغ آک شہید مریرہ تو ایلو کنڈ آن ڈالر ملک۔ او پارے کہ وزیراعلیٰ خیبرپختونخوا جانپڑسی کن ہنا و ڈیرہ اسماعیل خان اٹی پریس کانفرنس ہم کرے ولے جلہو نا مذمت ءِ کتو۔ او سوج ہرفے کہ اوغانستان نا دہشت گرد و پراکسی تا پن انتئے ہلپننگ انگ ءِ؟ او پارے کہ خیبرپختونخوا نا سیاسی سرکڑدہ غاک سیکورٹی فورس آتے نئے سرکڑدہ ئی تسنو و نئے اوفتا پد اٹ سلیسنو۔ او پارے کہ سی ٹی ڈی، بلٹ پروف گاڈی و سلہہ غاتیان بیدس جنگ مننگ کپک۔ نم بیرہ این ایف سی و 800 ارب نا حساب ءِ ایتبو۔ نم بلٹ پروف گاڈی تے پدی تسرے تاکہ سیاست کننگ کبو و پوسکن آ ایکٹ انا کمک اٹ پولیس نا واکداری تے کم کننگ نا کوشست کریرے۔ دا خت آ بنجائی وزیرحوالکاری عطاء اللہ تارڑ پارے کہ صوبائی حکومت نا نیت ہم خراب ءِ و طب تے ہم‘ او پارے کہ دا ٹی ٹی پی نا بی ٹیم ءِ او دوانزدہ ونیم سال اٹی دہشتگرد آتا کمکاری ءِ کریر‘ او دوبہ خلک کہ گاڈی تا رجسٹریشن کننگتو تاکہ دہشت گرد آک درست مفس‘ ایہن تو رجسٹریشن آن ارب آ روپئیک مچ مننگ کریرہ۔ بنجائی وزیر پارے کہ خیبرپختونخوا نا الس درمان کن راولپنڈی آ بننگ آ بیوس ءِ انتئے کہ خیبرپختونخوا ٹی ہچ ءُ آب اٹو ہسپتال اس اف۔ او پارے کہ سہیل آفریدی نا ساڑی گری ٹی اِرا اوغان مندوب قومی ترانہ نا شرف اٹ بش متوس۔ او اے این پی و جے یو آئی نا ذکر ءِ کرسا پارے کہ او لاش ہرفیر و خون تسر۔ او پارے کہ صوبائی حکومت ءِ فیصلہ کروئی تمک کہ او اوغانستان تون ءِ یا پاکستان تون۔ حوالکاری وزیر مستی پارے کہ اوغانستان نا کنڈ آن مروک سم کاری نا داسکان ہم مذمت کننگ تنے۔ خیبرپختونخوا دہشت گردی نا خاخر اٹ ہشنگ انگ ءِ وخت اس کہ صوبائی سرکڑدہ غاتا مچ آ چکار اسہ بندی اسے یلہ کرفنگ آٹے۔