دکی جلہو زرگزران ءِ نسخان رسیفنگ نا کوشست اسے،میر سلیم احمد خان کھوسہ

کوئٹہ، صوبائی وزیر مواصلات و تعمیرات میر سلیم احمد خان کھوسہ ضلع دکی نا علاقہ نانا صاحب زیارت اٹی روڈ آ کاریم کروک کمپنی نا کیمپ آ جلہو نا سخت انگا لوز آتے ٹی مذمت ءِ کرسا پارینے کہ دا وڑ انا لغوری آجلہوک بلوچستان اٹی شونداری‘ تعمیرِ نو و زرگزرانی سرجز آتے نسخان رسیفنگ نا کوشست اسے ءُ۔ تینا مذمتی بیان اٹی میر سلیم احمد کھوسہ پارے کہ کالعدم تنظیم بی ایل اے (فتنہ الہندوستان) نا کنڈ آن نانا صاحب زیارت اٹی روڈ جوڑ کروک کمپنی نا کیمپ ءِ شست کننگ بلوچستان نا شونداری وشونہالی نا دشمن آتا پین اسہ کارروائی اسے‘ او پارے کہ صوبہ ٹی کسر‘ بنداوی پنجر و ایلو شونداری ڈٹ آتیا کاریم کروک مزور تے شست کننگ بھاز است ہسون کروک ومذمت ناقابل عمل اسے‘ حوالی نارد اٹ کنسٹرکشن کمپنی نا کیمپ آ تدوک آ نن جلہو کننگا ہراڑے دکی‘ چمالنگ روڈ انا تفنگ کن کاریم کروک مزورک رہینگارہ۔ جلہو نا خت آ کیمپ آ تعینات پولیس کارندہ و ہندی سیکورٹی گارڈ آک جلہو گیر آتتون مقابلہ کریر سم کاری ناوخت آ اسہ سیکورٹی گارڈ زوال وخت اس کہ اسہ بندغ اس بھاز ٹھپی مس۔ حوالی نا رد اٹ جلہو آن پد سلہہ بند بندغ آک کیمپ اٹی ساڑی 18 مزورکار آتے تین تون دریر۔ صوبائی وزیر مواصلات و تعمیرات میر سلیم احمد خان کھوسہ پارے کہ بلوچستان اٹی شونداری ڈٹ آتیا کاریم کروک خواری کش آک صوبہ نا تعمیر و شونداری ٹی اہم کڑد ادا کننگ اٹی ءُ و اوفتے شست کننگ بیرہ انسانی حق آتا خلاف ورزی آخا بلکہ صوبہ ٹی روزگار و زرگزرانی سرجز آتے زہمی کننگ نا کوشست اس ہم ارے۔ میر سلیم احمد کھوسہ پارے کہ حکومت شونداری ڈٹ و اوفتیا کاریم کروک مزورکار آتا رکھ اکن وس انا کچ آ گام گیج کیک۔ او جلہو اٹی شہید مروک سیکورٹی گارڈ ءِ خراجِ عقیدت پیش کرسا پدخاہوت تون است ہسونی و ہمدردی نا درشانی ءِ کرے وخت اس کہ ٹھپی نا دمدستی دراخ جوڑی کن دعا کرے۔ او برمتہ کروک مزور تا زوت و رکھی وڑ اٹ پدی اتنگ کن کوشست کننگ نا باوری کرفسا پارے کہ حکومت زہمی خاہوت آتتون اوار سلوک ءِ۔